نالن جي صفائي اين ڊي ايم اي کان سنڌ حڪومت حوالي ڪرڻ واري درخواست رد.

سپريم ڪورٽ ڪراچيءَ ۾ نالن جي صفائي اين ڊي ايم اي کان سنڌ حڪومت حوالي ڪرڻ واري درخواست رد ڪري ڇڏي.

سپريم ڪورٽ ڪراچيءَ رجسٽري ۾  جسٽس گلزار احمد جي سربراهي ۾ نالن جي صفائي بابت ڪيس جي ٻڌڻي ٿي، جنهن سلسلي ۾ ايڊوڪيٽ جنرل سنڌ، ڪمشنر ڪراچي ۽ ٻيا پيش ٿيا.

ٻڌڻي جي شروعات ۾ ايڊوڪيٽ جنرل سنڌ ٽي آگسٽ تائين نالن جي صفائي بابت صوبائي حڪومت جي رپورٽ پيش ڪئي ۽ ٻڌايو ته  ڪراچي ۾ 340 وڏا ۽ 514 ننڍا نالا آهن، گجر، مواڇ ڳوٺ ۽ سي بي ايم نالو اين ڊي ايم اي حوالي آهي، جن مان گجر نالي تي 50 ۽ ٻين تي 20 کان 25 سيڪڙو صفائي جو ڪم ڪيو ويو آهي.

چيف جسٽس پڇاڻو ڪيو ته نالن جي صفائي ٿي رهي آهي ته پاڻي ڪيئن ڀرجي ويو، ان تي ايڊوڪيٽ جنرل ٻڌايو ته نالا  ڪچري سان ڀريل هئا، ان ڪري پاڻي بيهجي ويو.

ايڊوڪيٽ جنرل سنڌ عدالت کي ٻڌايو ته وڏو وزير نالن جي صفائي واري ڪم جي پاڻ ماينٽرنگ ڪري رهيو آهي.

ان تي چيف جسٽس گلزار احمد چيو ته  ائين ئي ڪم ٿيو هو، جيئن ٻين هنڌن تي ٿيندو آهي، سنڌ حڪومت نالن جي صفائي ڪري رهي هئي ته پوءِ اين ڊي ايم اي ڇو آئي.؟

ايڊوڪيٽ جنرل سنڌ چيو ته خبر ناهي اين ڊي ايم اي ڇو آئي، نالن جي صفائي لاءِ 30 آگسٽ تائين وقت ڏنو وڃي.

چيف جسٽس، جسٽس گلزار احمد ڪاوڙ جو اظهار ڪندي چيو ته اوهان نالن جي صفائي جي تصوير پيش ڪري ڇا ٿا ثابت ڪرڻ چاهيو، ٻن نالن جي تصوير ڏيکاري چئو ٿا ڪراچي صاف  ٿي ويو.

ان موقعي تي  جسٽس اعجاز الاحسن چيو ته اين ڊي ايم اي کي نالن جي صفائي جو چيو آهي اهي جاپان مان ناهن آيا، سنڌ حڪومت ماڻهن جون ڏکيائون گهٽ ڪري، اوهان چاهيو ٿا ته هو اين ڊي ايم اي کي ڪم کان روڪين.

عدالت نالن جي صفائي وارو ڪم اين ڊي ايم اي کان سنڌ حڪومت حوالي ڪرڻ بابت درخواست رد ڪري ڇڏي…….