پرڏيهي وزير شاهه محمود قريشي چيو آهي ته پاڪستان ۽ سعودي عرب هڪ ٻئي جي ضرورت آهن، ٻنهي ملڪن جي لاڳاپن ۾ ڪابه خرابي ناهي.
هڪ انٽرويو ۾ شاهه محمود قريشي چيو ته هڪ سال دوران والاريل ڪشمير جون حالتون تبديل ٿيون آهن، ڪشمير ۾ جيڪو ڪجهه ٿي رهيو آهي اهو ڪنهن کان لڪل ناهي.
هن چيو ته ڪشمير جون حالتون تيزي سان خراب ٿي رهيون آهن، ڀارت مان آواز اٿڻ شروع ٿي ويا آهن، مودي سرڪار جي ڪشمير پاليسي سان ڪشميري ناراض آهن، حالتون اڳ کان وڌيڪ خراب ٿي چڪيون آهن.
سندس چوڻ هو ته چين هر ڏکي وقت ۾ ساڻن گڏ بيٺل رهيو آهي، سي پيڪ جي اهميت کان ڪير به انڪار نه ٿو ڪري سگهي.
شاهه محمود قريشي چيو ته سي پيڪ منصوبو جلد مڪمل ڪرڻ بابت به ڳالهيون ڪيون وينديون.
هن چيو ته کيس اميد آهي ته چين جي هم منصب سان سندس ملاقات فائديمند ثابت ٿيندي.
سندس چوڻ هو ته سعودي عرب ۽ پاڪستان جا لاڳاپا سٺي رهيا آهن ۽ سٺا رهندا، ٻنهي ملڪن جي لاڳاپن ۾ ڪابه رنڊڪ ناهي، رنڊڪ وجهندڙن کي ناڪامي نصيب ٿيندي.
شاهه محمود قريشي چيو ته سعودي عرب فلسطين معاملي تي واضح موقف اختيار ڪيو آهي، سعودي عرب واضح بيان ڏنو آهي اهو پاڪستان جي موقف موجب آهي.
هن چيو ته سعودي عرب پاڪستان جي فلسطين بابت موقف ۾ هڪ جهڙائي آهي.
سندس چوڻ هو ته سندس خواهش آهي ته ايندڙ ڪجهه ڏينهن دوران سعودي عرب سان وڌيڪ ڳالهيون ٿين، هو هڪ ٻئي جي ضرورت رهيا آهن ۽ اڄ به آهن.
شاهه محمود قريشي چيو ته چين جي سهڪار سان 55 سالن کانپوءِ ٽي ڀيرا ڪشمير مسئلي تي سلامتي ڪائونسل ۾ غور ڪيو ويو.
هن چيو ته افغانستان ۾ تبديلي آندي پئي وڃي، چين ۽ پاڪستان ڪورونا وائرس تي گهڻي قدر ضابطو آندو آهي.
سندس چوڻ هو ته چين ۽ پاڪستان ڄاڻن ٿا ته خطي ۾ اهم تبديليون ٿيون آهن.
