ٻيٽن تي وفاق جي والار خلاف ڪنڌڪوٽ مان ڪراچي لاءِ نڪتل قومي عوامي تحريڪ جو محبت سنڌ بيداري مارچ منزل طرف روان دوان آهي

ٻيٽن تي وفاق جي والار خلاف ڪنڌڪوٽ مان ڪراچي لاءِ نڪتل قومي عوامي تحريڪ جو محبت سنڌ بيداري مارچ منزل طرف روان دوان آهي، اياز لطيف پليجي جو چوڻ آهي ته سنڌ جي ٻيٽن ۽ ڪارونجهر تي قبضو ڪنهن به صورت ۾ قبول نه ڪيو ويندو. اياز لطيف پليجي جي اڳواڻي ۾ ڪنڌڪوٽ مان محبت سنڌ بيداري مارچ شروع ڪيو ويو. محبت سنڌ بيداري مارچ ۾ جسقم، ايس ٽي پي، جي يو آءِ ۽ ٻين پارٽين جا ڪارڪن وڏي انگ ۾ شريڪ آهن. محبت سنڌ بيداري مارچ جي تنگواڻي، ٺل ۽ جيڪب آباد ۾ گلن جي ورکا ڪري سندن شاندار آجيان ڪئي وئي. ان موقعي تي قومي عوامي تحريڪ جي صدر اياز لطيف پليجي ريلي کي خطاب ڪندي چيو ته سنڌ جا ٻيٽ صوبي جي ملڪيت آهن، ڪنهن کي به قبضي جي اجازت نه ڏني ويندي. سندس چوڻ هو ته ٻيٽن تي قبضو ۽ سنڌ جو ورهاڱو صوبي جو عوام ڪنهن به صورت ۾ برداشت نه ڪندو. قومي عوامي تحريڪ جي صدر چيو ته پ پ سرڪار سنڌ دشمن آهي، سندس اٽڪلن کان صوبي جو عوام چڱي ريت واقف آهي. اياز لطيف پليجي چيو ته ٻيٽن تي وفاق جي قبضي خلاف هو ميدان تي نڪتا آهن، ريلي مختلف شهرن کان ٿيندي اَٺ نومبر تي ڪراچي پهچندي. سندس چوڻ هو ته سنڌ جي عوام کي اپيل آهي ته 8 نومبر تي ڪراچيءَ ۾ طاقت جو مظاهرو ڪري ٻڌايو وڃي ته سنڌي جاڳيا آهن، جيڪي پنهنجي وسيلن تي قبضو ڪرڻ نه ڏيندا. اياز لطيف پليجي جو چوڻ هو ته سنڌ حڪومت جي ڪرپشن جي ڪري سنڌ جا شهر کنڊر بڻجي ويا آهن، جيڪب آباد جي حالت انگريز دور ۾ بهتر هئي، ان وقت سٺيون اسپتالون هونديون هيون، هاڻ شهر صحت ۽ تعليم جي سهولتن کان محروم آهي. سندس چوڻ هو ته شهرين کي بنيادي سهولتون ڏيارڻ لاءِ تحريڪ هلائڻ جي ضرورت آهي،  جنهن لاءِ قومي عوامي تحريڪ جو ساٿ جاري رهندو.

وڌيڪ پڙهو…