بلاول جو بيان پي ڊي ايم جي پاليسي هڪ نه هئڻ جو ثبوت آهي, شيخ رشيد

حڪومت چيو آهي ته بلاول نواز شريف تي بي اعتمادي ظاهر ڪري ڇڏي آهي. سڌ سماءَ واري وفاقي وزير شبلي فراز هڪ بيان ۾ چيو ته  بلاول جو بيان پي ڊي ايم جي پاليسي هڪ نه هئڻ جو ثبوت آهي. هن چيو ته بلاول ڀٽو زرداري نواز شريف تي بي اعتمادي ظاهر ڪري ڇڏي آهي. سندس چوڻ هو ته ثابت ٿي ويو ته پي ڊي ايم ذاتي مفاد ۽ اقتدار پرستن جو اتحاد آهي. ريلوي واري وزير شيخ رشيد چيو ته بلاول، آصف زرداري ۽ نواز شريف کي گڏ نه هلڻو آهي، پ پ ۽ مسلم ليگ ن هڪ ٻئي جون مخالف پارٽيون آهن. هڪ بيان ۾ شيخ رشيد چيو ته پ پ ۽ مسلم ليگ ن گلگ بلتستان ۾ پنهنجي پنهنجي سياسي مهم هلائي رهيا آهن، ٻنهي پارٽين کي الڳ الڳ سينيٽ جي چونڊن ۾ حصو وٺڻو آهي. هن چيو ته پ پ استعيفائون نه ڏيندي، سياست ۾ ڳالهين جا در بند نه ٿيندا آهن، پي ڊي ايم ڀلي ٻه جلسا ٻيا ڪري، هاڻي حالتون بهتري طرف وينديون. سندس چوڻ هو ته سياست ۾ ڳالهيون ختم نه ٿينديون آهن، سياستدان ڪڏهن به ڳالهين جا در بند نه ڪندا آهن. شيخ رشيد چيو ته پي ڊي ايم جو اتحاد گهڻي عرصي تائين نه هلي سگهندو، نواز شريف پنهنجا ٻيڙا ساڙي ڇڏيا آهن، هاڻي شهباز شريف جي ٻيڙين تي به پٿر اڇلائي رهيو آهي. هن چيو ته پ پ ڪراچي ۾ نواز شريف کي تقرير کان روڪي جواب ڏئي ڇڏيو، بلاول اچو مون کي ماريو واري پاليسي اختيار نه ڪندو. سندس چوڻ هو ته فضل الرحمان مسلم ليگ ن سان هلي سگهي ٿي پر مسلم ليگ ن نه هلندي، گلگت بلتستان ۾ ڪا به پي ڊي ايم ناهي سڀ پارٽيون ووٽ گهري رهيون آهن.

وڌيڪ پڙهو…