نئون ديرو ويجهو مڇي مارڻ جي ڳالهه تان ٻن ڌرين ۾ جهيڙو، هڪ ڄڻو قتل

نئون ديرو ويجهو مڇي مارڻ جي ڳالهه تان جيها برادريءَ جي ٻن ڌرين ۾ جهيڙي جي نتيجي ۾ هڪ ڄڻو قتل ۽ 3 زخمي ٿي پيا. ڳوٺ فيض محمد جيهو ۾ تلاءَ مان مڇي مارڻ تان جيها برادريءَ جي ٻن ڌرين ۾ جهيڙو ٿي پيو.  هڪ ڌر جي هٿياربندن مڇي ماريندڙ ڌر مٿان سڌي فائرنگ ڪري ڏني جنهن جي نتيجي ۾ 35 ورهين جو علي گل جيهو گوليون لڳڻ ڪري مارجي ويو ۽ 3 ڄڻا محمد پريل، محمد اسحاق، امام الدين جيهو سخت زخمي ٿي پيا، جن کي فوري طور علاج لاءِ نئون ديرو اسپتال پهچايو ويو. واقعي جي اطلاع تي نئون ديرو ٿاڻي جي پوليس واقعي واري هنڌ پهچي مقتول نوجوان جو لاش کڻائي نئون ديرو اسپتال آندو جتان پوسٽ مارٽم ڪرائڻ بعد لاش وارثن حوالي ڪيو ويو، جڏهن ته زخمين کي طبي امداد ڏيڻ بعد وڌيڪ علاج لاءِ چانڊڪا اسپتال لاڙڪاڻي نيو ويو.  نوجوان جو لاش  ڳوٺ فيض محمد جيهو ۾ گهر پهچڻ تي روڄ راڙو پئجي ويو. واقعي بابت مولا بخش جيهو صحافين کي ٻڌايو ته ڳوٺ ۾ سرڪاري تلاءُ آهي جتان ڳوٺ جا سمورا ماڻهون مڇي ماريندا آهن، اهو تلاءُ ڪنهن جي ذاتي ملڪيت ناهي. هن چيو ته نوجوان تلاءَ مان مڇي ماري رهيا هئا ته  علي حسن، حسين بخش، محمد نواز جيهو سميت جيها برادريءَ جي 20 کان وڌيڪ هٿيارڀندن حملو ڪري سڌي فائرنگ ڪري ڏني جنهن ۾ سندن هڪ نوجوان علي گل قتل ٿي ويو ۽ 3 ڄڻا زخمي ٿيا آهن. سندن چوڻ هو ته جوابدارن ساڻن ظلم ڪيو آهي جن کي فوري طور گرفتار ڪري انصاف ڪيو وڃي.  هوڏانهن واقعي جي اين سي نئون ديرو ٿاڻي تي داخل ڪئي وئي، جڏهن ته جوابدار فرار ٿي ويا، جن مان پوليس هڪ به گرفتار نه ڪري سگهيو آهي.

وڌيڪ پڙهو…