حيدرآباد ۾ ايس ٽي پي ڪارڪنن پاران وائس چيئرمين الطاف جسڪاڻي جي قتل خلاف ٽائرن کي باهه ڏئي احتجاجي مظاهرو ڪيو ويو آهي. ايس ٽي پي تعلقي قاسم آباد جي اڳواڻ شبير علي جوڻيجي، اياز ڪاڪا، ڊاڪٽر اياز صفدر ۽ ٻين جي اڳواڻيءَ ۾ ٽائرن کي باهه ڏئي احتجاجي مظاهرو ڪري نعريبازي ڪئي وئي. احتجاج ڪندڙن ميڊيا سان ڳالهائيندي چيو ته سنڌ ترقي پسند پارٽي جي وائس چيئرمين الطاف جسڪاڻي کي ٽنڊي الهيار ۾ قتل ڪيو ويو جنهن جي هو سخت لفظن ۾ مذمت ڪن ٿا. هنن چيو ته الطاف جسڪاڻي شاگرد دور کان سياست ۾ تمام گهڻو متحرڪ هو هن بنا ڪنهن رنگ نسل جي سياست ڪئي ۽ هميشه پنهنجي سياست ذريعي غريب ماڻهن جي ڀلائي لاءِ ڪم ڪيا. هنن اعليٰ اختيارين کان مطالبو ڪيو ته الطاف جسڪاڻي جي قتل ۾ ملوث سمورن جوابدارن کي فوري طور گرفتار ڪيو وڃي ٻي صورت ۾ احتجاج جو دائرو وڌايو ويندو.
