سنڌ جي مختلف شهرن ۾ رولو ۽ ڇتن ڪتن جو آزار نه گهٽ نه ٿي سگهيو

ٻارڙن سميت ويهن کان وڌيڪ شهرين کي ڪتن جي ڏاڙهڻ جو سي ايم او سميت يوسي سيڪريٽرين مٿان ڪيس داخل ڪيا ويا. عمرڪوٽ تعلقي ۾ شهرين کي ڪتن جي ڏاڙهڻ جو چئن يوسي سيڪريٽري مٿان ڪيس داخل ڪيو ويو. ڪتا مار مهم  شروع نه ڪرڻ ۽ رولو ڪتن کي نه مارڻ تي يونين ڪائونسل شاهه مراد شاهه جي سڪريٽري آغا ذوالفقار، يونين ڪائونسل ڇور، نيو ڇور جي سڪريٽري عبدالرحمن سمون ۽ يوسي کاروڙو سيد جي سڪريٽري رزاق سمون تي ايف آءِ آر داخل ڪئي وئي. دادو ضلعي ۾ ڇتن ڪتن وڌيڪ ڇهن ڄڻن کي ڏاڙھي زخمي ڪرڻ بعد متاثرن جو انگ 10 ٿي ويو. شهرين کي ڪتن جي ڏاڙهڻ بعد ميھڙ، ڪي اين شاھ ۽ جوھي ٿاڻن تي ميونسپل ڪميٽين جي چيف ميونسپل آفيسرن تي ڪيس داخل ڪيا ويا، جڏهن ته ٿرڙي محبت ۾ يوسي بوٿري جي سيڪريٽري اعجاز لاشاري تي ايف آءِ آر داخل ڪئي وئي.  شاھ پنجون، دادو بي سيڪشن، ڪڪڙ، فريد آباد ٿاڻن تي پڻ يونين ڪائونسل جي سيڪريٽرين تي ڪيس داخل ڪيو ويو. ڪَڪڙ ۾ 13 ڄڻن کي ڪتن جي ڏاڙهڻ جو يوسي سيڪريٽري مٿان ايف آءِ آر داخل ڪئي وئي. يوسي ڪَڪڙ ۽ مٺو ٻٻر جي سيڪريٽري حامد سومري تي سرڪاري فرياد تي ڪيس داخل ٿيو. دادو ضلعي جي مختلف علائقن ۾ ھڪ ھفتي دوران 66 ماڻھن کي ڇتن ڪتن جي ڏاڙھڻ جا واقعا پيش اچڻ بعد عدالتي حڪم تحت ڪيس داخل ڪيا ويا. ٺڪراٺي ۾ رولو ڪتن وڌيڪ هڪ نينگر کي ڏاڙهي وڌو. نينگر نذير پٺاڻ کي وارثن اسپتال آندو، جتي کيس ويڪسين لاءِ سکر ريفر ڪيو ويو، جڏهن ته سرڪاري فرياد تي ڪيس داخل ٿيڻ باجود يوسي مبارڪپور جو سيڪريٽري گرفتار نه ٿي سگهيو. گهوٽڪيءَ ۾  سي ايم او نادر شاهه امروٽي مٿان نينگر کي ڪتي جي ڏاڙهڻ جو ڪيس داخل ڪيو ويو. پوليس ڳوٺ مسو ڪلوڙ واسي علي محمد چني کي ڪتي جي ڏاڙهڻ جو سي ايم او تي ڪيس داخل ڪيو. ڳڙهي حسن سرڪي ۾ ستن ورهين جي نينگر حميد سرڪي کي ڪتي ڏاڙهي وڌو. نينگري کي ڳڙهي حسن اسپتال ۾ ويڪسين نه ملڻ تي کيس ٺل آندو ويو، جڏهن ته پوليس نينگر کي ڪتي جي ڏاڙهڻ جو ٽي ايم او مٿان ڪيس داخل نه ڪيو.

وڌيڪ پڙهو…