اسلامي سهڪار تنظيم، والاريل ڪشمير ۾ ڀارتي ظلم خلاف ٺهراءُ منظور ڪندي گڏيل قومن کان مذهب جي توهين تي قانونسازي جو مطالبو ڪيو آهي

اسلامي سهڪار تنظيم، والاريل ڪشمير ۾ ڀارتي ظلم خلاف ٺهراءُ منظور ڪندي گڏيل قومن کان مذهب جي توهين تي قانونسازي جو مطالبو ڪيو آهي. اسلامي سهڪار تنظيم ”او آءِ سي“ جو پرڏيهي وزيرن جو ڪائونسل اجلاس ٿيو، جنهن ۾ والاريل ڪشمير جي صورتحال سميت اولهه ۾ وڌندڙ اسلامو فوبيا جي واقعن تي غور ڪيو ويو. اجلاس دوران اسلامو فوبيا جي وڌندڙ واقعن تي ڳڻتي جو اظهار ڪيو  ويو. او آءِ سي، گڏيل قومن کان مطالبو ڪيو ته مذهب جي توهين وارن واقعن کي روڪڻ لاءِ قانونسازي ڪئي وئي. اجلاس دوران والاريل ڪشمير ۾ ڀارتي ظلمن خلاف ٺهراءُ پڻ منظور ڪيو ويو. منظور ڪيل ٺهراءُ ۾ چيو ويو ته ڪشمير مسئلو ستن ڏهاڪن کان سلامتي ڪائونسل جي ايجنڊا تي آهي، 5 آگسٽ 2019ع وارا ڀارتي قدم سلامتي ڪائونسل جي ٺهرائن جي سڌي توهين آهن. ٺهراءَ ۾ چيو ويو ته ڀارتي قدمن جو مقصد ڪشميرين کي اقليت ۾ تبديل ڪرڻ ۽ کانئن حق کسڻ آهي. ٺهراءَ ۾ ڀارت جي جارحاڻي ورتاءَ، بالاڪوٽ سانحي، ايل او سي ۽ ورڪنگ بائونڊري تي ڀارتي اڳرائيءَ جي مذمت ڪئي ڪئي. منظور ڪيل ٺهراءِ ۾ مطالبو ڪيو ويو ته گڏيل قومن جي فوجي مبصر گروپ جو ڪردار ايل او سي جي ٻنهي طرف وڌايو وڃي ۽ خاص نمائندو گڏيل قومن جي سيڪريٽري جنرل کي آگاهه ڪري.ٺهراءَ ۾ چيو ويو ته ڀارت زور ڀريو وڃي ته ڪشمير، سرڪريڪ ۽ ٻيا تڪرار عالمي قانون ۽ ماضي جي معاهدن موجب حل ڪيا وڃن. منظور ڪيل ٺهراءِ ۾ چيو ويو گڏيل قومن جو سيڪريٽري جنرل خاص ايلچي مقرر ڪري، جيڪو ڄمون ۽ ڪشمير ۾ انساني حقن جي ڀڃڪڙين جي مسلسل نگراني ڪري.ٺهراءَ موجب 5 آگسٽ 2019ع کانپوءِ ڪشمير تڪرار جي جلد حل واري اهميت وڌي وئي آهي.

وڌيڪ پڙهو…