سنڌ ٽي وي نيٽ ورڪ جي سڏ تي سنڌ جا ٻيٽ ۽ زمين سنڌ جي ملڪيت جي سري هيٺ 6 ڊسمبر تي ثقافتي ڏهاڙو ملهائڻ لاءِ ڌرتي ڌڻي ثقافت رنگن ۾ رڱجي ويا آهن

سنڌ ٽي وي نيٽ ورڪ جي سڏ تي سنڌ جا ٻيٽ ۽ زمين سنڌ جي ملڪيت جي سري هيٺ 6 ڊسمبر تي ثقافتي ڏهاڙو ملهائڻ لاءِ ڌرتي ڌڻي ثقافت رنگن ۾ رڱجي ويا آهن، مختلف شهرن ۾ تقريبون ڪوٺائي ۽ ريليون ڪڍي ثقافت کي اجاگر ڪرڻ جو سلسلو جاري آهي. حيدرآباد ۾ سنڌياڻي تحريڪ پاران سنڌ جا ٻيٽ بچايو وسيلا بچايو جي عنوان هيٺ ثقافتي تقريب ڪوٺائي وئي، جنهن ۾ عورتن ۽ ٻارڙن سنڌي ثقافتي ويس وڳا پهري شرڪت ڪئي. تقريب ۾شاگردياڻين قومي ۽ ثقافتي گيتن تي ٽيبلوز پڻ پيش ڪيا.  تقريب کي خطاب ڪندي مقررن چيو ته سنڌ ٽي وي نيٽورڪ ثقافتي ڏينهن ملهائي سنڌ جي 5 هزار سالن جي تهذيب، ثقافت کي دنيا ۾بهتر نموني مشهور ڪيو  آهي. جيڪب آباد ۾ سولنگي اتحاد طرفان شهيد الله بخش پارڪ کان ريلي ڪڍي وئي، جنهن ۾ سولنگي برادري جي ماڻهن وڏي انگ ۾ شرڪت نه ڪئي. رمضان سولنگي جي اڳواڻي ۾ نڪتل ريلي مختلف هنڌن کان ٿيندي پريس ڪلب پهتي، جتي نوجوانن طرفان قومي گيتن تي رقص ڪيو ويو. ٽنڊي الهيار ۾ به ثقافتي رنگ نروار ٿي ويا آهن، ميونسپل ورڪر يونين جي سڏ تي ريلي  ڪڍي وئي، جنهن ۾ قومي گيتن تي نوجوانن جهمريون هنيون. يونين جي صدر جليل بلوچ، عاشق زرداري ۽ ٻين پريس ڪلب تائين ريلي ڪڍي، جتي هُنن صحافين کي اجرڪ اوڍايا. ڪوٽڙي ۾ سنڌ ٽي وي نيٽ ورڪ جي سڏ تي پاڪستان خاصخيلي اتحاد جي صدر منٺار خاصخيلي، علي نواز خاصخيلي ۽ ٻين ثقافت کي اجاگر ڪرڻ لاءِ ريلي ڪڍي. ريلي مختلف هنڌن کان ٿيندي المدينه چوڪ پهتي، جتي مٿن گلن جي ورکا ڪئي وئي. بدين ۾ عورتن پاران ثقافت کي اجاگر ڪرڻ لاءِ ريلي ڪڍي وئي. سماجي تنظيم سورمين سٿ جي اڳواڻ  عورتن  ثقافتي ويس وڳا پهري جيم خاني کان پريس ڪلب تائين ريلي ڪڍي. عورتن جي ريلي تي بدين جي شھرين مھراڻ چوڪ، فروٽ چوڪ ۽ پريس ڪلب اڳيان گلن جي ورکا ڪئي. پريالوءِ، ٽنڊي غلام حيدر ۽ ٻين شهرن ۾ پڻ شهرين طرفان ثقافت کي اجاڳر ڪرڻ لاءِ ريليون ڪڍيون ويون، جتي گيتن تي نوجوان جهمريون هڻندا رهيا. نوابشاهه  پريس ڪلب ۾  تقريب ڪوٺائي وئي، جنهن ۾  شاعر فياض چنڊ ڪليري، سگهڙ لياقت لنڊ، پروفيسر اعجاز، واپاري اڳواڻ عبدالقيوم قريشي، راضا ڏاهري ۽ ٻين شرڪت ڪئي. تقريبن ۾ صوفي راڳين قومي ۽ ثقافتي گيت ٻڌائي ثقافت کي ڀيٽا پيش ڪئي، جڏهن ته شاعرن ۽ اديبن به خوب داد حاصل ڪيو. ڏوڪري جي ٽائون هال ۾ مچ ڪچهري ڪرائي وئي، جنهن ۾ سياسي سماجي اڳواڻن توڙي صحافين شرڪت ڪئي.

وڌيڪ پڙهو…