سنڌ ۾ ڪورونا جي پکيڙي تي ضابطو نه اچي سگهيو آهي، ڪراچي ۾ ڊاڪٽر ۽ عورت فوت ٿي ويا، سکر، نوشهري فيروز، مٽياري ۽ ٽنڊي ڄام ۾ 38 ڪيس ظاهر ٿيڻ ظاهر ٿيا آهن. ڪراچي جي خانگي اسپتال ۾ ڊاڪٽر ڪورونا سبب لاڏاڻو ڪري ويو. ڊاڪٽر وارث علي کي ڪورونا سبب ڪراچي جي خانگي اسپتال ۾ داخل ڪيو ويو هو، جتي هن دم ڌڻي حوالي ڪيو. صحت کاتي موجب هن مهل تائين 40 ڊاڪٽر فوت ٿي چڪا آهن. ٽنڊي الهيار ۾ 65 ورهين جي عورت ڪورونا سبب فوت ٿي وئي. ڊي ايڇ او موجب عورت کي گهر ۾ ئي آئسوليٽ ڪيو ويو هو، سندس تدفين ايس او پي تحت ڪئي ويندي. سکر ۾ به سول اسپتال جو اسسٽنٽ ميڊيڪل آفيسر سميت پنج ڊاڪٽر ڪورونا ۾ مبتلا ٿي ويا آهن. متاثر مريضن مان هڪ ڊاڪٽر جي طبيعت خراب سبب ڪراچي منتقل ڪيو ويو آهي. سول اسپتال جي ايم ايس ڊاڪٽر تسليم خميساڻي تصديق ڪندي چيو ته اسسٽنٽ ميڊيڪل آفيسر شاهد اقبال ڪرونا ۾ مبتلا ٿي ويو آهي. هن چيو ته ڪورونا وائرس ۾ چيسٽ شعبي جو انچارج شفي محمد کهاوڙ، آءِ سي يو وارڊ جو انچارج مقصود صديقي سميت پنج ڊاڪٽر متاثر ٿيا آهن. ايم ايس تسليم اختر جو چوڻ هو ته ڊاڪٽر مقصود صديقي جي طبيعت خراب ٿي وڃڻ ڪري ڪراچي منتقل ڪيو ويو آهي، جڏهن ته ڪورونا ۾ متاثر ٿيل ڊاڪٽرن کي آئسوليٽ ڪيو ويو آهي. نوشهري فيروز ضلعي صحت کاتي جي ڪاموري موجب موجب پندرنهن ڪيس ظاهر ٿيڻ کانپوءِ متاثرن جو انگ متاثرن جو انگ وڌي 1191 ٿي ويو آهي. هن چيو ته چويهه ڪلاڪن دوران 205 ڄڻن جي ڪورونا ٽيسٽ ڪئي وئي هئي ، جن مان 15 جي رپورٽ هاڪاري آئي. سندس چوڻ هو ته ضلعي ۾ ايڪٽو ڪيسن جو تعداد 107 آهي، جن کي سندن ئي گهرن ۾ آئيسوليٽ ڪيو ويو آھي . ڪاموري چيو ته موري ۾ 9،نوشھروفيروز تعلقي ۾ 3، ڀريا 2 ۽ ڪنڊيارو جو هڪ ڪوروونا جو ڪيس ظاهر ٿيو آهي. صحت کاتي جي ڪاموري جو چوڻ هو ته ضلعي ۾ ڪرونا مان 1082 مريض صحتمند ٿي چڪا آھن . مٽياري ۾ پڻ 9 ڄڻا ڪورونا وائرس ۾ مبتلا ٿي ويا آهن. ڊي ايڇ او 9 ڄڻن کي ڪورونا هجڻ جي تصديق ڪندي چيو ته متاثرن کي سندن ئي گهرن ۾ آئسوليٽ ڪيو ويو آهي. ٽنڊي ڄام ۾ پڻ ٻن ڊاڪٽرن سميت اٺ ڄڻا ڪورونا ۾ مبتلا ٿي ويا آهن. رورل هيلٿ سينٽر جي انتظاميه پاران او پي ڊي بند ڪري مريضن کي واپس ڪيو ويو. صحت کاتي موجب ڪورونا متاثرن کي سندن ئي گهرن ۾ آئسوليٽ ڪيو ويو آهي.
وڌيڪ پڙهو
