سنڌ جي مختلف شهرن ۾ روڊ حادثن جي نتيجي ۾ ٽريفڪ پوليس اهلڪار سميت ڏهه ڄڻا زخمي ٿي پيا

سنڌ جي مختلف شهرن ۾ روڊ حادثن جي نتيجي ۾ ٽريفڪ پوليس اهلڪار سميت ڏهه ڄڻا زخمي ٿي پيا. فيض گنج  ويجهو مهراڻ هاءِ وي تي بلوچستان کان سانگهڙ ويندڙ مسافر بس ڪلٽي ٿي پئي. حادثي جي نتيجي ۾ هڪ ٻارڙي ۽ عورت سميت ست ڄڻا زخمي ٿي پيا. زخمي ٿيل ڊرائيور عطا دين،  ڪوئٽا واسي مسافر عبدالله، نوشڪي واسي پپو، عزيزالله، حاجي احمد ۽ سانگھڙ واسي ٻارڙي شگفتا ۽ عورت  نسيمه کي اسپتال آندو ويو. پوليس  موجب بس سان حادثو ڪوهيڙي سبب هاءِ وي تي پهريان ڪلٽي ٿيل ڪمند جي ٽرالي سان ٽڪر ٿيڻ بعد ٿيو آهي. پوليس موجب بس جي ڊرائيور سميت ٻن زخمين جي حالت ڳڻتي جوڳي هجڻ ڪري کين نوابشاهه سول اسپتال ريفر ڪيو ويو. ٻانڌي ويجهو منگيا موري وٽ ٽريفڪ پوليس اھلڪار  چيڪنگ دوران گاڏي جي ٽڪر ۾ زخمي ٿي پيو. اهلڪارن طرفان گاڏين جي چيڪنگ دوران ٽرالر کي بيھڻ جو اشارو ڏنو ويو.  ٽرالر ڊرائيور پاران گاڏي نه بيھارڻ تي پوليس اھلڪار انور اڄڻ ٽرالر جي ھيٺان اچي سخت زخمي ٿي پيو، جنھن کي فوري طور رورل ھيلٿ سينٽر ٻانڌي آندو ويو جتان کيس طبي امداد ڏيڻ بعد نوابشاھ اسپتال منتقل ڪيو ويو. حادثي بعد ٽرالر ڊرائيور طرفان گاڏي پوئتي روس ڪرڻ دوران ھڪ ڪار تي ٽرالر چڙھي ويو، جنهن سبب ڪار سوار معجزاڻي طور محفوظ رھيا.

وڌيڪ پڙهو…