پي ڊي ايم جون 11پارٽيون گڏجي به پي ٽي آءِ جيترا وڏا جلسا نه ٿيون ڪري سگهن، وزيراعظم عمران خان

وزيراعظم عمران خان چيو آهي ته هو قومي ڊائلاگ کان ڪڏهن به پوئتي ناهن هٽيا، سياسي ڊائلاگ جو بهترين هنڌ پارليامينٽ آهي, حڪومت کي  گهر موڪلڻ جو آئيني طريقو بي اعتمادي جي رٿ آهي، مخالف ڌر رٿ آڻڻ چاهي ٿي  ته اسيمبليءَ ۾ اچيَ، پي ڊي ايم استعيفيٰ ڏيندي ته هو اليڪشن ڪرائي وڌيڪ مضبوط ٿي ويندا. سيالڪوٽ ۾ صحافين سان غير رسمي ڳالهه ٻولهه ڪندي وزيراعظم عمران خان چيو ته مخالف ڌر جلسن کانسواءِ ڪري ڇا ٿي ڪري سگهي؟ پي ڊي ايم جون 11پارٽيون گڏجي به پي ٽي آءِ جيترا وڏا جلسا نه ٿيون ڪري سگهن. هن چيو ته کيس سمجهه ۾ نه پيو اچي ته هي ڇا ٿا ڪرڻ چاهن،   استعيفيٰ ڏيندا ته هو چونڊون ڪرائي وڌيڪ مضبوط ٿي ويندا. وزيراعظم چيو ته حڪومت کي گهر موڪلڻ جو آئيني طريقو بي اعتمادي جي رٿ آهي، مخالف ڌر رٿ پيش ڪرڻ چاهي ٿي  ته اسيمبليءَ ۾ اچي. عمران خان چيو ته هو قومي ڊائلاگ کان ڪڏهن به پوئتي ناهن هٽيا، سياسي ڳالهين جو بهترين هنڌ پارليامينٽ آهي. وزيراعظم چيو ته هو پارليامينٽ ۾ سمورا جواب ڏيڻ لاءِ تيار آهي، جمهوريت تڏهن هلندي، جڏهن ڳالهيون ٿينديون. عمران خان چيو ته هو ڳالهائڻ شروع ڪن ٿا ته مخالف ڌر چوي ٿي ڪيس ختم ڪريو، کين ڪو به مسئلو ناهي، هو هر معاملي تي ڳالهائڻ لاءِ تيار آهن، پر اين آر او ۽ ڪرپشن ڪيسن تي ڳالهيون نه ٿينديون. ان کان اڳ سيالڪوٽ ۾ ايئر سيال جو افتتاح ڪرڻ  بعد تقريب کي خطاب ڪندي وزيراعظم عمران خان چيو ته خانگي ائير لائن سان پي آءِ اي تي ڪارڪردگي بهتر بڻائڻ لاءِ دٻاءُ وڌندو. وزيراعظم چيو ته مخالف ڌر تنقيد ڪندي هئي ته موديءَ ڀارت ۾ لاڪ ڊائون ڪيون، پاڪستان ۾ ڇو نه ٿيو ڪيو وڃي. هن چيو ته لاڪ ڊائون لاءِ تنقيد ڪندڙن مخالف ڌر هاڻي جلسا ڪري رهي آهي.عمران خان چيو ته ڪورونا جي ٻي لهر ۾ احتياط نه ڪيو ويو ته سيارا ڏکيا گذرندا، ايس او پيز تي عمل سان صنعت ۽ ماڻهن کي بچائي سگهبو.

وڌيڪ پڙهو…