مخالف ڌر جي ڏڦيڙ واري سياست کي قوم رد ڪري ڇڏيو آهي، بوزدار

پنجاب جي وڏي وزير عثمان بوزدار چيو آهي ته مخالف ڌر جي ڏڦيڙ واري سياست کي قوم رد ڪري ڇڏيو آهي، اپوزيشن جلسا ڪري ڪورونا پکيڙ جو سبب  بڻجي رهي آهي. جاري ڪيل بيان ۾ پنجاب وڏي وزير عثمان بوزدار چيو ته مخالف ڌر جي ناڪاري سياست تي افسوس آهي. سندس چوڻ هو ته بدقسمتي سان مخالف ڌر جي 11 پارٽين ڪورونا کي به  ڀائيوار بڻايو آهي، اپوزيشن ڪورونا پکيڙ جو سبب بڻجي رهي آهي. وڏي  پزير عثمان بوزدار چيو ته  هڪ پاسي ڪورونا سبب اسپتالون ڀرجي رهيون آهن ۽ موتن ۾ اضافو ٿي رهيو آهي ته ٻي طرف مخالف ڌر کي پنهنجي ناڪاري ايجنڊا پوري ڪرڻ جي ڳڻتي آهي. هن چيو ته مخالف ڌر کي عوامي جي پرواهه ناهي، اپوزيشن جي اين آر او واري خواهش ڪڏهن به پوري نه ٿيندي، لاهور واسي اڄ پي ڊي ايم جي ناڪاري  سياست کي رد ڪري ڇڏيندا. ٻي طرف خاص مددگار فردوس عاشق اعواڻ چيو آهي ته پي ڊي ايم جي جلسي ۾ ڪا رنڊڪ نه پئي وڌي وڃي جاري ڪيل بيان ۾ فردوس عاشق اعواڻ چيو ته هو ڏسڻ چاهين ٿا مخالف ڌر جي تِرن ۾ ڪيترو تيل آهي پر اپوزيشن ڏڦيڙ ۽ ٽڪراءُ واري پاليسي سامهون آڻڻ چاهي ٿي. سندس چوڻ هو ته ملڪ جو عوام محافظن ۽ دشمنن ۾ فرق رکڻ ڄاڻي ٿو، حڪومت شهرين کي ڪورونا کان بچائڻ ۾ رڌل آهي ته پي ڊي ايم وبا ڏانهن ڌڪي رهي آهي. فردوس عاشق اعواڻ چيو ته  لاهور ۾ قانون هٿ ۾ کڻندڙن خلاف ڪارروائي ڪئي ويندي.

وڌيڪ پڙهو…