پاڪستان ڊيموڪريٽڪ موومينٽ حڪومت خلاف تحريڪ جي ٻي مرحلي جي شروعات اڄ مردان کان ڪري رهي آهي، جتي ريلي ۽ جلسي جون تياريون مڪمل ڪيون ويون آهن. پي ڊي ايم جي ترجمان ميان افتخار جاري ڪيل پڌرائي ۾ چيو آهي ته ٻي مرحلي جي شروعات مردان ۾ مهانگائي خلاف مارچ کان ڪئي پئي وڃي. هن چيو ته مارچ جي قيادت پي ڊي ايم سربراهه مولانا فضل الرحمان، مريم نواز، يوسف رضا گيلاني، آفتاب شيرپائو، امير حيدر هوتي ۽ ٻيا ڪندا. سندس چوڻ هو ته پاڪستان ڊيموڪريٽڪ موومينٽ مهانگائي جي عذاب مان عوام کي نجات ڏيارڻ لاءِ پوري سگهه سان وڙهندي. پي ڊي ايم ترجمان چيو ته سموريون ريليون راشا ڪئي موٽر وي انٽر چئينج پنج تي پڄاڻي تي پهچنديون. ذريعن جو چوڻ آهي ته چيو ته ڪي پي حڪومت مردان انتظاميه ريلين جي اجازت ناهي ڏني. ذريعن موجب پي ڊي ايم اجازت کانسواءِ ريليون ڪڍندي. هوڏانهن پوليس پاران ڪنهن به اڻوڻندڙ واقعي کي منهن ڏيڻ لاءِ سڪيورٽي جا غير معمولي انتظام ڪيا ويا آهن.
