گذريل ڪجھ مهينن ۾ اسرائيل ٽرمپ انتظاميه جي مدد سان يو اي ئي ، بحرين، سوڊان ۽ موروڪو سان لاڳاپا بحال ڪرڻ جا معاهدا ڪري چڪو آهي جنهن بعد خيال ڪيو ويو هيو ته شايد اسرائيل پاڪستان به ساڳي قسم جو معاهدو ڪري لاڳاپا بحال ڪرڻ چاهي ٿو. ان سلسلي ۾ هڪ بحث عالمي ميڊيا تي عام ٿي وئي جنهن ۾ اهو خيال ڪيو ويو ته شايد پاڪستان به ساڳي قسم جو معاهدو ڪري لاڳاپا بحال ڪندو ۽ اسرائيل کي تسليم ڪندو اهڙي قسم جي خبرن جي سامهون ايندي پاڪستان جي پرڏيهي وزير توڙي ترجمان کي اهو بيان ڏيڻو پيو ته پاڪستان جو اهڙو ڪو به ارادو نه آهي ۽ فلسطين جي آزادي ۽ ٻه رياستي حل تائين اهو ممڪن نه آهي. ان سلسلي ۾ تازو ئي اسرائيلي ڪابينه وزير جو بيان سامهو آيو آهي جنهن ۾ هُن جو چوڻ آهي ته پاڪستان مسلم ملڪن جي ان لسٽ ۾ شامل نه آهي جنهن سان لاڳاپا بحال ڪرڻ اسرائيل جي پاليسي هجي.
ان سلسلي ۾ اسرائيل جي علائقائي سهڪار واري وزير آفر اڪنس جو هڪ خانگي ٽي وي چينل تي بيان سامهو آيو آهي جنهن ۾ هُن دعويٰ ڪئي ته آمريڪي صدر ٽرمپ جي مدي پوري ٿيڻ کان اڳ وڌيڪ ٻه ملڪ به اسرائيل سان لاڳاپا قائم ڪرڻ واري معاهدي تي دستخط ڪندا. هُن ٻنهي مان ڪنهن جو به نالو ظاهر نه ڪيو پر واضع ڪيو ته هڪ ملڪ نار واري ملڪن مان آهي. ان معاملي تي هُن توڙي جو ڪنهن به ملڪ جو ذڪر نه ڪيو پر اهو ضرور واضع ڪيو ته اهو سعودي عرب نه آهي. ٻئي ملڪ جي لاءِ هُن چيو ته اهو اوڀر جو مسلم ملڪ آهي جيڪو سائز ۾ ننڍو نه آهي. اسرائيلي وزير توڙي جو ان ملڪ جو نالو ظاهر نه ڪيو پر تنهن هوندي به اشارو ڏنو ته اهو اوڀر جو هڪ مسلمان ملڪ آهي جيڪو رقبي جي لحاظ کان ننڍو نه آهي ۽ اهوُ ملڪ پاڪستان نه آهي.
واضع رهي ته هن ئي هفتي ۾ پاڪستان جي پرڏيهي وزير شاه محمود قريشي اهو واضع ڪيو هيو ته پاڪستان فلسطين جي آزاد رياست کان سواءِ اسرائيل کي تسليم نه ٿو ڪري سگهي. ان صورتحال جو مجموعي طور جائزو وٺجي ته اوڀر جي تمام مسلمان ملڪن اسرائيل سان لاڳاپا قائم نه ڪرڻ جو بيان ڏئي ڇڏيو آهي. انڊونيشيا جيڪو تمام وڏي مسلمان آبادي رکي ٿو تنهن به اسرائيل سان فلسطين جي آزادي کان سواءِ لاڳاپا رکڻ نا ممڪن قرار ڏنو آهي ۽ اسرائيل کي تسليم ڪرڻ کان انڪار ڪيو آهي. مليشيا پڻ ساڳي قسم جو اعلان ڪري اسرائيل سان لاڳاپا نه رکڻ جو بيان ڏنو آهي. هوڏانهن بنگلاديش جي پرڏيهي کاتي به اهو واضع ڪيو آهي ته بنگلاديش فلسطين جي آزاد رياست کانسواءِ ڪنهن به قسم جا لاڳاپا قائم نه ڪندو. واضع هجي ته فلسطين جون اسرائيل سان ڳالهيون 2014 بعد رڪجي ويون هيون، جنهن بعد فلسطيني هن لاڳاپا بحال ڪرڻ وارن معاهدن ۾ پاڻ کي اڪيلو سمجهي رهيا آهن ۽ ڀرپور نموني ردِعمل ڏئي رهيا آهن.
