جاپاني وزيرِاعظم شنزو ابي عوام توڙي پارليماني ڪميٽي کان پارٽي پاران چيري بلوسم اسڪينڊل تان معافي گهري ورتي آهي. خبر مطابق شنزو ابي جي پارٽي هُن جي ڄاڻ کان سواءِ سياسي مفاد حاصل ڪرڻ خاطر چيري بلوسم تي 3 ڪروڙ رپين جي سبسڊي ڏني هئي جيڪا جاپان جي قانون مطابق غير قانوني آهي. ان سلسلي ۾ واضع هجي ته جاپان ۾ سياسي فنڊ استعمال ڪرڻ خلاف سخت قانون آهن جنهن مطابق ڪا به پارٽي اقتدار دوران پنهنجي سياسي مفاد خاطر ڪو پروگرام شروع نه ٿي ڪري سگهي. جاپان جي قانون مطابق ڪو به سياستدان پنهنجي حلقي ۾ ڪا به اهڙي شيءِ ورهائي نه ٿو سگهي جيڪو گفٽ جي زمري ۾ اچي. هي قانون ايترو ته سخت آهي جو ابي جي ڪابينه جي ٻن وزيرن کي پنهنجي حلقن ۾ هنداڻا، ڪيڪڙا، ۽ پٽاٽا ورهائڻ جي ڏوه ۾ استعفيٰ ڏيڻي پئي.
تازو چيري بلوسم وارو مسئلو سامهون تڏهن آيو جڏهن مخالف ڌُر ابي طرفان 2018 ۾ ڏنل هڪ آجياڻي تي سوال اٿاريا. مخالف ڌُر جو چوڻ هيو ته هن آجياڻي ۾ شرڪت لاءِ هر مهمان کان 48 ڊالر فيس طور ورتا ويا پر ايتري پيسن ۾ ٽوڪيو جي مهانگي هوٽل ۾ آجياڻو ممڪن نه هيو تنهن ڪري وزيرِاعظم آفيس طرفان ان جا خرچ پورا ڪرڻ لاءِ بقايا پئسا ڀريا ويا جيڪو غير قانوني آهي. واضع رهي ته 66 سالن جي اڳوڻي وزيرِاعظم شنزو ابي گذريل سيپٽمبر ۾ صحت جو سبب ڄاڻائي پنهنجي عهدي تان استيعفيٰ ڏني هئي.
