روس جي جيل انتظاميه پيوٽن تي تنقيد ڪندڙ مخالف ڌُر جي اڳواڻ اليڪسي نولني کي جرمني کان واپس اچڻ لاءِ الٽيميٽم ڏئي ڇڏيو ۽ ماسڪو آفيس اچي رپورٽ ڪرڻ جي هدايت ڪئي آهي، ٻي صورت ۾ واپسي تي کيس جيل کي منهن ڏيڻو پئجي سگهي ٿو. واضح رهي ته صدر پيوٽن جي سخت مخالف نوالني کي هڪ فلائيٽ ۾ حالت خراب ٿيڻ سبب مرڻينگ حالت ۾ جرمني اماڻيو ويو هيو جتي علاج بعد هن جي صحت بحال ٿي. اولهندي ملڪن ان حوالي ۾ شڪ ظاهر ڪيو آهي ته نوالني کي زهر ڏئي مارڻ جي ڪوشش ڪئي وئي هئي. ردِعمل ۾ روس الزامن کي رد ڪندي چيو ته زهر جا ڪي به ثبوت نه مليا آهن ۽ نوالني جي صحت کي جواز ڄاڻائي يورپ جا ملڪ سياست ڪري رهيا آهن.
واضح رهي ته نوالني کي پيوٽن خلاف سخت موقف رکڻ ڪارڻ روس توڙي ٻاهرين دنيا ۾ پذيرائي حاصل آهي. هو روس ۾ پيوٽن حڪومت جي ڪرپشن توڙي اقتدار تي قبضي خلاف آواز اٿاريندڙ ڪجھه ڳڻيل ماڻهن مان هڪ آهي. روس حڪومت خلاف آواز اٿارڻ سبب هُن تي ڪيئي ڀيرا ڪيس داخل ٿيا ۽ جيل جو منهن ڏسڻو پيو. تازو ئي فيڊرل پِرزن سروس سومر ڏهاڙي هڪ فرمان جاري ڪيو جنهن ۾ قيد جي سزا معطل ٿيڻ جي شرطن جي ڀڃڪڙي ڄاڻائي نوالني کي واپس وطن پهچي ماسڪو ۾ قائم آفيس رپورٽ ڪرڻ جي هدايت ڪئي وئي آهي. هِن فرمان ۾ فيڊرل پرزن سروس ڄاڻايو ته برطانوي ميڊيڪل جرنل دا لينسٽ موجب “نوالني سيپٽمبر ۾ اسپتال مان ڊسچارج ٿيو ۽ آڪٽوبر تائين هن جي طبيعت مڪمل بحال ٿي چڪي آهي، انڪري سزا يافته هجڻ ڪري هُن تي ڪورٽ طرفان ڪجھه ذميواريون آهن جيڪي هُو پوريون نه ڪري رهيو آهي”. واضح رهي ته هڪ چوري جي ڪيس ۾ نوالني کي ساڍا ٽي سال سزا ٿي هئي جيڪا هن وقت معطل آهي ۽ ان جو مدو ايندڙ 30 ڊسمبر تي پورو ٿيندو. نوالني جو موقف رهيو آهي ته هُن کي سياسي طور ان ڪيس ۾ نامزد ڪيو ويو هيو. پِرزن سروس طرفان فرمان ۾ چيو ويو آهي ته نوالني کي انسپيڪشن اٿارٽي آڏو پيش ٿيڻو آهي جيڪا جائزو وٺندي ته نوالني سزا معطلي جي شرطن تي پورو لٿو آهي يا ڪنهن قانون توڙي شرط جي ڀڃڪڙي ٿي آهي. ڪنهن ڀڃڪڙي جي صورت ۾ سزا ٻيهر بحال ٿي سگهي ٿي ۽ نوالني کي جيل جو منهن ڏسڻو پئجي سگهي ٿو. ان سلسلي ۾ واضح رهي ته جيل اٿارٽيز طرفان ڪا واضح ڊيڊلائين ته نه ٻڌائي وئي آهي پر نوالني طرفان پنهنجي وڪيل ڏانهن موڪليل اسڪرين شاٽ ۾ اهو ٻڌايو ويو آهي ته هُن (نوالني) وٽ اڱاري تائين وقت آهي ته هُو ماسڪو آفيس رپورٽ ڪري. هن سڄي معاملي تي نوالني جي ترجمان ڪيرا يرمش جو ٽوئيٽر تي چوڻ هيو ته “نوالني لاءِ اهو ممڪن نه آهي ته هُو هن وقت ماسڪو پهچي. ڪيرا جو وڌيڪ چوڻ هيو ته پرزن سروس هي سڄي ڪارروائي ڪريملن جي چوڻ تي ڪري رهي آهي”. واضح رهي ته ڪريملن جو چوڻ آهي ته نوالني هن وقت هڪ آزاد روسي شهري آهي هو جڏهن چاهي روس واپس اچي سگهي ٿو.
