لانگ مارچ ۽ جلسن سان حڪومت ڪيڏانهن نه ويندي، نه ئي پي ڊي ايم جي چوڻ تي وزيراعظم استعيفيٰ ڏيندو. شاهه محمود

پرڏيهي وزير شاهه محمود قريشي چيو آهي ته لانگ مارچ ۽ جلسن سان حڪومت ڪيڏانهن نه ويندي، نه ئي پي ڊي ايم جي چوڻ تي وزيراعظم استعيفيٰ ڏيندو. جاري ڪيل پنهنجي بيان ۾ شاهه محمود قريشي چيو ته 31 جنوري جي ڊيڊلائن جو اهو ئي حال ٿيندو جيڪو 31 ڊسمبر واري جو ٿيو. سندس چوڻ هو ته 31 ڊسمبر تي مخالف ڌر جون استعيفائون اچڻيون هيون، پي ڊي ايم وارا 31 جنوري جو انتظار ڇوٿا ڪن، جيڪو فيصلو ڪرڻو آهي ڪري ڇڏين. شاهه محمود قريشي چيو ته پي ڊي ايم جي احتجاج، لانگ مارچ ۽ جلسن سان حڪومت ڪيڏانهن نه ويندي، نه ئي وزيراعظم استعيفيٰ ڏيندو. هن چيو ته پي ڊي ايم ۽ ڪراچي ۾ اسرائيل خلاف ريلي ڪڍي پئي وڃي، سوچڻ جي ڳالهه آهي ته انهن کي ان جي ضرورت ڇو پئي، اصل ۾ مخالف ڌر عوام کي ڌوکو ڏئي رهي آهي. شاهه محمود قريشي چيو ته اسرائيل جي حوالي سان سندن موقف واضح آهي، مولانا اجمل قادري جو بيان وضاحت طلبي جهڙو آهي، هو ٻڌائي ته ڪنهن جي ايجنڊا تي ڪم ڪري رهيو آهي.؟ سندس چوڻ هو ته پاڪستان ۽ سعودي جا تاريخي لاڳاپا آهن، سعودي عرب نيامي ڊڪلريشن ۾ پاڪستان جو ساٿ ڏنو. پرڏيهي وزير شاهه محمود قريشي چيو ته ڀارت دهشتگردي جي سکيا ۽ پابندي پيل تنظيمن جي مدد ڪري رهيو آهي، هو فالس فليگ آپريشن جهڙو ڊرامو رچائي سگهي ٿو.

وڌيڪ پڙهو…