پيپلز پارٽي جي فيصلي کانپوءِ پي ڊي ايم وکرجي وئي آهي, شاهه محمود قريشي

پرڏيهي وزير شاهه محمود قريشي چيو آهي ته پيپلز پارٽي جي فيصلي کانپوءِ پي ڊي ايم وکرجي وئي آهي،  پ پ جي فيصلن جو اختيار آصف علي زرداري وٽ آهي هن پنهنجو فيصلو ٻڌائي ڇڏيو آهي، بلاول رڳو ڏيکاءُ لاءِ آهي. جاري ڪيل بيان ۾ پرڏيهي وزير شاهه محمود قريشي چيو ته مخالف ڌر جو موقف ٽڪراءُ جو مجموعو آهي. هن چيو ته پاڪستان پيپلز پارٽي واضح ڪري ڇڏيو آهي ته هنن جو پي ڊي ايم کان راهون جدا آهن ۽ ن ليگ ۽ ف ليگ ۾ اختلاف واضح آهن. سندس چوڻ هو ته مخالف ڌر جو موقف تبديل ٿي چڪو آهي، پهريان استعيفيٰ ڏئي رهيا هئا، پر هاڻ وٺن جي ڳالهه ڪري رهيا آهن. پرڏيهي وزير شاهه محمود قريشي چيو ته وزيراعظم عمران خان ڪنهن جي چوڻ تي استعيفيٰ نه ڏيندو. هن چيو ته اها حقيقت آهي ته پيپلز پارٽي سنڌ حڪومت جي قرباني ڏيڻ لاءِ تيار ناهي ۽ پ پ لانگ مارچ کي به نواز شريف جي واپسي سان ڳنڍي ڇڏيو آهي. سندس چوڻ هو ته مخالف ڌر وارا نه استعيفيٰ ڏيڻ واري معاملي تي سنجيده آهن نه ئي لانگ مارچ ۾ دلچسپي رکن ٿا. شاهه محمود قريشي چيو ته ن ليگ ۾ شهباز شريف جي سوچ رکندڙ  ڳالهين جا حامي آهن. پرڏيهي وزير دعويٰ ڪندي چيو ته شهباز شريف ڳالهين کي پنهنجي آزاد سان ڳنڍي رهيو آهي، هن تسليم ڪيو آهي ته ن ليگ جو هڪ ڌڙو ڳالهين جي حق ۾ آهي. هن چيو ته خواجا آصف جي گرفتاري حڪومت نه ناهي ڪئي ۽ نه ئي سرڪار جي چوڻ تي ٿي آهي. سندس چوڻ هو ته خواجا آصف کي نيب گرفتار ڪيو آهي، جيڪو هڪ خودمختيار ادارو آهي. شاهه محمود قريشي چيو ته  هو اڳ ئي چئي چڪو آهي ته پي ڊي ايم اتحاد غير فطري آهي، تنهن ڪري هو نه هلي سگهندو.

وڌيڪ پڙهو…