(انٽرنيشنل ڊيسڪ) نئين چونڊيل آمريڪي صدر جو بائيڊن جي حلف برداري واري تقريب ڪورونا وبا سبب تاريخي ۽ شاندار نموني ڪرڻ بدران سادگي سان ڪرڻ جو فيصلو ڪيو ويو آهي. ان سلسلي ۾ ڪجھه هفتا اڳ افتتاحي تقريب واري ڪانگريس جي جوائنٽ ڪميٽي اهو اعلان ڪيو هيو ته هُو نئين صدر جي افتتاحي تقريب جي مهمانن واري لسٽ محدود ڪري رهيا آهن. رياست مزوري مان چونڊيل ريپبلڪن سينيٽر ۽ ڪميٽي جي چيئرمين راءِ بلنٽ صحت جي ماهرن سان مشوري کانپوءِ چيو ته “ڪورونا وبا سبب اسان مهمانن ۽ تقريب ۾ شرڪت ڪندڙن جي انگ کي محدود ڪري رهيا آهيون”. واضح هجي ته عام طور تي ڪميٽي 2 لک ٽڪيٽون جاري ڪندي آهي جنهن ۾ ڪانگريس ۽ انهن جي خاندانن جو انگ پڻ شامل آهي. هن ڀيري ڪورونا وبا سبب صرف شرڪت ڪندڙن جو انگ هڪ هزار تائين محدود ڪرڻ جو فيصلو ڪيو ويو آهي. نه رڳو اهو روايتي طور ٿيندڙ صدارتي مانجهاندو پڻ ڪورونا سبب رد ڪيو ويو آهي. ڪميٽي جي ترجمان جو چوڻ آهي ته “پلاننگ دوران صدارتي حلف برداري واري تقريب ۾ مهمانن توڙي ميزبان جي صحت کي ترجيح ڏني وئي آهي”.
ان سلسلي ۾ ياد رهي ته صدر ٽرمپ پنهنجي حلف برداري واري تقريب لاءِ هڪ تڪراري دعويٰ ڪندو رهيو آهي ته هُن جي تقريب ۾ ماڻهن جي شرڪت تاريخي طور تي سڀ کان وڌيڪ رهي جنهن ۾ لڳ ڀڳ 5 لک ماڻهن شرڪت ڪئي. واضح رهي ته صدر ٽرمپ جي ان دعويٰ کي ڪيترن ئي ماهرن رد ڪيو آهي ۽ صدر ٽرمپ پنهنجي دعويٰ جي حق ۾ ڪو واضح ثبوت يا ڊيٽا نه ڏئي سگهيو آهي. ان حوالي سان ڏسجي ته صدر باراڪ اوباما جي 2009ع واري افتتاحي تقريب ۾ غير سرڪاري ڳڻپ مطابق لڳ ڀڳ 18 لک ماڻهن شرڪت ڪئي جڏهن ته هُن جي ٻئي دور ۾ رڳو شرڪت ڪندڙن جو انگ 10 لک رهيو. ان سلسلي ۾ وفاقي حڪومت تڪراري ڳڻپ ۽ تعداد جي نتيجي ۾ شرڪت ڪندڙن جو انگ ظاهر ڪرڻ بند ڪري ڇڏيو آهي. وفاقي حڪومت طرفان انگ اکر جاري ڪرڻ جي ذميواري کي هن وقت لوڪل گورنمينٽ ۽ ماهرن پوري ڪئي آهي.
تقريب تاريخي اعتبار سان ڏسجي ته ڪورونا سبب جو بائيڊن جي حلف برداري جي تقرير سڀ کان مختلف رهندي. ان کان اڳ رونالڊ ريگن جي حلف برداري جي تقريب مختلف رهي هئي جيڪا ٿڌ ۽ برفباري سبب روايتي فوجي پريڊ ملتوي ڪئي وئي هئي جڏهن ته تقريب پڻ بند حال ۾ ڪوٺائي وئي هئي.
