سنڌ ۾ رولو ۽ ڇتن ڪتن جو آزار گهٽ نه ٿي سگهيو آهي

سنڌ ۾ رولو ۽ ڇتن ڪتن جو آزار گهٽ نه ٿي سگهيو آهي، مختلف شهرن ۾ ڪتن ٻارڙن سميت ويهن ڄڻن کي ڏاڙهي وڌو. غوثپور ۾ ڪتن ڏھن ڄڻن کي ڏاڙهي زخمي ڪيو. ڪتن شھزادو ڀئي، ياسين ڏاھاڻي، نوردين اوڳاھي، عبدالنبي ملڪ، گلبھار خان، ڪيچي جاگيراڻي، صدام اوڳاھي، اياز اوڳاھي ۽ نينگري شازيه اوڳاھي کي ڏاڙهي زخمي ڪيو، جنهن بعد کين وارثن سرڪاري اسپتال  آندو جتي وئڪسين ڪئي وئي. شهرين جو چوڻ آهي ته انتظاميه طرفان ڪتا مار مهم شروع نه ڪرڻ سبب  ڇتن ۽ رولو ڪتن جو آزار وڌي ويو آهي. هنن چيو ته  ڪتا مار مهم شروع ڪري کين پريشاني کان بچايو وڃي. قمبر ۾ رولو ڪتن عورت سميت پنجن ڄڻن کي ڏاڙهي وڌو. ڪتن 9 ورهين جي سحر خاتون، پيرسن محمد عظيم، حوران خاتون، غلام سڪينه ۽ عبدارزاق کي ڏاڙھي زخمي ڪيو.  ڪتن جي ڏاڙهيلن کي قمبر سول اسپتال مان وئڪسين ڪرائي وئي. مديجي جي يوسي جندوديرو ۾ ڪتا مار مهم شروع نه ٿيڻ ڪري رولو ۽ ڇتن ڪتن جو آزار وڌي ويو.  ڪتن ڳوٺ سهتا جي رهواسڻ نينگري آصفه سهتو کي ڏاڙهي زخمي ڪيو، جنهن بعد وارثن کيس مديجي اسپتال آندو. اسپتال ۾ ويڪسين ڪرڻ بعد نينگري کي گهر روانيو ڪيو ويو. ان موقعي تي زخمي نينگري جي امڙ منظور خاتون سهتو ٻڌايو ته يوسي جندوديرو ۾ رولو ڇتن ڪتن جو آزار وڌي ويو آهي. هن چيو ته هڪ مهيني اندر پنج ڳوٺاڻن کي ڪتن ڏاڙهيو آهي،  انتظاميه رولو ڇتن ڪتن مارڻ لاءِ مهم شروع ناهي ڪئي. متاثرن مطالبو ڪيو ته جلد کان جلد ڪتا مار مهم شروع ڪري پريشاني کان بچايو وڃي. مرزاپور جي ڳوٺ ڳڙهي موصل جي رهواسي غلام نبي جوڻيجي کي ڪتي جي ڏاڙهڻ جو ڪيس سرڪاري فرياد تي يوسي سيڪريٽري مٿان داخل ڪيو ويو. مرزاپور جي يوسي سيڪريٽري ڪامران جوڻيجي مٿان سرڪاري فرياد تي ڄهٻر شيخ ٿاڻي تي ايف آءِ آر داخل ڪئي وئي. جاتي  ۾ ڪتن 12 ورهين جي نينگر شهزاد علي ملاح کي ڏاڙهي زخمي ڪري وڌو. ڪتي جي ڏاڙهيل نينگر کي وارث کڻائي اسپتال آيا، جتي کيس ڪتي جي چڪ کان بچاءَ واري ويڪسين لڳائي وئي. اسپتال انتظاميه نينگر کي ويڪسين ڪري گهر روانو ڪيو.

وڌيڪ پڙهو…