( انٽرنيشنل ڊيسڪ) اتر ڪوريا جي اڳواڻ ڪِم جونگ ان جو پنهنجي پارٽي جي رٿيل اربع ڏهاڙي واري ڪانگريس اجلاس جي موقعي تي چوڻ هيو ته “ملڪ جو معاشي ترقياتي پلان تقريبن هر شعبي ۾ نامڪمل رهجي ويو آهي ۽ گذريل پنج سال تاريخ ۾ سڀ کان مشڪل ۽ بدترين رهيا”. ملڪ جي خابرو اداري موجب ڪم جونگ ان جو چوڻ هيو ته “ان مسئلن کي حل ڪرڻ لاءِ سڀ کان تيز ۽ اثرائتو رستو اهو آهي ته اسان پنهنجي طاقت مطابق ڀرپور ڪوشش ڪيون”. واضح رهي ته پارٽي ڪانگريس جو اجلاس اتر ڪوريا جي تاريخ جو اٺون جڏهن ته گذريل پنج سالن جو هي پهريون اجلاس آهي، هي اجلاس ان ڪري به اهميت جو ڳو آهي جو هي صدر آمريڪي جو بائيڊن جي حلف برداري جي ڪجھه ئي هفتا پهريان گهرايو ويو آهي. ان سلسلي ۾ ڏٺو وڃي ته اتر ڪوريا جا واشنگٽن سان لاڳاپا رولڙي جو شڪار آهن جو ٻنهي طرفان رکيل شرطون ڪنهن معاهدي کي حتمي شڪل ڏيڻ جي آڏو پيون اچن. اتر ڪوريا جو اسرار آهي ته آمريڪا طرفان پابندين ۾ نرمي ڪئي وڃي، جڏهن ته واشنگٽن طرفان ايٽمي قوت کي حذف ڪرڻ تي زور آهي. واضح رهي ته اتر ڪوريا جو ٻاهرين دنيا سان هونئن به رابطو گهٽ آهي پر ڪورونا وبا سبب هُن جو پنهنجي اڪيلي ساٿي چين سان به زميني رابطو ڪٽجي ويو آهي.
اترڪوريا جي خابرو اداري ڪورين سينٽرل نيوز ايجنسي طرفان ڏنل انگ اکرن مطابق 7000 پارٽي ورڪرن اجلاس ۾ شرڪت ڪئي. هن اجلاس جي پهرئين ڏينهن تي ڪِم معاشي ترقياتي پلان تي ناراضگي جو اظهار ڪيو جنهن ۾ گهربل ٽارگيٽ حاصل نه ڪيا ويا آهن. اجلاس جي پهرئين ڏينهن يعني اڳاري ڏهاڙي ڪم چيو ته “اسان پنهنجي غلطين مان ڀرپور نموني سبق سکي رهيا آهيون ۽ انهن ئي غلطين ۽ تجربن مان سکي اسان اڳتي وڌي سگهون ٿا”. ڪِم جونگ ان طرفان پنهنجي ملڪ جي معاشي حالت جي ذميواري کي قبول ڪرڻ تي ڪافي ماهرن کيس ساراهيو آهي. الجزيره جي رپورٽر روب مڪبرائيڊ جو اتر ڪوريا جي صورتحال تي چوڻ هيو ته “ڪِم جو معاشي ابتر واري صورتحال جو اعتراف اتر ڪوريا جي معاشي بدحالي جو اعتراف آهي”. واضح رهي ته ڪانگريس اتر ڪوريا ۾ حڪومت ڪندڙ پارٽي جو مٿانهين سطح جو اجلاس آهي جنهن ۾ حڪومت جي پاليسي بابت فيصلا واضح ڪيا ويندا آهن. ڪانگريس جي اجلاس ۾ اعليٰ حڪومتي فيصلن سبب ماهرن جي ان اجلاس تي خاص نظر هوندي آهي ڇاڪاڻ ته ان ذريعي اتر ڪوريا جي معاشي توڙي سياسي حالت جي جهلڪ واضح ٿيندي آهي. اهڙي ئي قسم جو اشارو هن ڀيري ڪم جي ڀيڻ ڪِم يو جونگ جو اجلاس ۾ شريڪ ٿيڻ آهي جيڪو هُن جي سياسي قد ۾ واڌ جو اشارو آهي. هِن اجلاس مان اهو به واضح ٿئي پيو ته اتر ڪوريا اندروني جوڙ جڪ ۽ معاشي بحران کي منهن ڏئي رهيو آهي ۽ هاڻي ڪِم جونگ اُن سخت دٻاءُ ۾ آهي. هن وقت اتر ڪوريا جي مجموعي معاشي صورتحال جو جائزو ورتو وڃي ته ڪورونا وبا سبب اتر ڪوريا جو معاشي بحران سخت ٿي ويو آهي. چين سان هُن جو واپار گهٽجي تاريخ جي سڀ کان گهٽ ليول تي اچي ويو آهي، جڏهن ته ٻين ملڪن سان به هُن جا ڪاروباري توڙي سفارتي لاڳاپا گهٽجي ويا آهن. نه رڳو اهو پر گذريل سال آيل ٻوڏ سبب به اتر ڪوريا جي معيشت بدحالي جوشڪار ٿي آهي.
(الجزيره جي ٿورن سان)
