سنڌ سرڪار بجليءَ جي بحران کي وفاقي سرڪار جي ناڪامي قرار ڏئي ڇڏيو

سنڌ سرڪار بجليءَ جي بحران کي وفاقي سرڪار جي ناڪامي قرار ڏئي ڇڏيو. هڪ بيان ۾ سنڌ سرڪار جي ترجمان مرتضيٰ وهاب چيو ته بجلي بند هجڻ سليڪٽيڊ حڪومت جو ڪارنامو آهي. هن چيو ته بجلي بند هجڻ حڪومت جي بدترين ڪارڪردگي جو نتيجو آهي. سندس چوڻ هو ته سياري ۾ بجلي بند هجڻ خراب ڪارڪردگي جو ثبوت آهي. مرتضيٰ وهاب چيو ته نااهلن جي ٽولي عوام جو جيئن جنجال ڪري ڇڏيو  آهي. هن چيو ته سنڌ جي ڪيترن ئي ضلعن ۾ بجلي بحال ناهي ٿي، هي 22ڪروڙ عوام کي 11 رانديگرن جي ٽيم سمجهن پيا. توانائي واري وزير امتياز شيخ چيو ته بجليءَ جو ملگير بريڪ ڊائون توانائي واري وزارت جي نااهلي ۽ ناڪامي آهي. هن چيو ته ڪيترائي ڪلاڪ گذرڻ باوجود توانائي واري وزارت فالٽ ڳولي نه سگهي آهي. سندس چوڻ هو ته اين ٽي ڊي سي جي سربراهه کي فوري طور طلب ڪيو وڃي، فوري طور جاچ ڪميشن ٺهڻ گهرجي. امتياز شيخ چيو ته جاچ ڪميشن ۾ سمورن صوبن جي نمائندگي شامل ڪئي وڃي.هن چيو ته هڪ پاور پلانٽ سان سموري ملڪ جو نظام ويهڻ قومي ادارن لاءِ ڳڻتي جوڳي ڳالهه آهي. سندس چوڻ هو ته اين ٽي ڊي سي ۾ صوبن جي نمائندگي نه هئڻ سبب چيڪ اينڊ بيلنس  جو نظام ناهي. صوبائي وزير اسماعيل راهو چيو ته اوچتو نظام ۾ اهڙي ڪهڙي خرابي پيدا ٿي جو  ملڪ اوندهه ۾ ٻڏي ويو آهي. هن چيو ته خرابي بجلي جي نظام نه پر حڪومتي نظام ۾ آهي. سندس چوڻ هو ته سليڪٽيڊ حڪومت بجلي بند ڪري ملڪ کي ري اسٽارٽ ڪري رهي آهي، قوم کي رڳو گهٻرائڻو ناهي. اسماعيل راهو چيو ته عمران خان ۽ سندس ٽيم نااهل، ناڪام ۽ چور آهي، چورن ذريعي ملڪ هلي نه ٿو سگهي.

وڌيڪ پڙهو…