اسلام آباد هائيڪورٽ، ڊاڪٽر عافيه صديقي جي آزادي بابت پرڏيهي وزارت جي رپورٽ تي بي اعتمادي جو اظهار ڪيو آهي. آمريڪي ۾ قيد ڊاڪٽر عافيه صديقي جي آزادي بابت درخواست تي ٻڌڻي اسلام آباد هائيڪورٽ جي جسٽس عامر فاروق ڪئي. وڪيل ڊاڪٽر فوزيا صديقي ٻڌايو ته ڊاڪٽر عافيه صديقي کي اغوا ڪيو ويو، اڃا تائين سندن ڪا به اپڊيٽ ناهي ته هو زنده آهي يا نه؟ جسٽس عامر فاروق پڇاڻو ڪيو ته ڇا پاڪستان آمريڪا آڏو حڪومتي سطح تي معاملو اٿاريو؟ ڊپٽي اٽارني جنرل خالد محمود عدالت کي ٻڌايو ته عافيه صديقي جي ڪورونا ٽيسٽ ٿي جيڪا نگيٽو آئي. جسٽس عامر فاروق چيو ته هر شهري جو تحفظ ڪرڻ رياست جي ذميواري آهي، سيڪريٽري سطح جو آفيسر اچي ٻڌائيندو ته معاملي تي ڪيتري اڳڀرائي ٿي آهي. ڊپٽي اٽارني جنرل چيو ته پاڪستاني قونصل خانو ان معاملي کي ڏسي رهيو آهي، جسٽس عامر فاروق سوال ڪيو ته ڊاڪٽر عافيه کي ڪٿي رکيو ويو آهي؟ جنهن تي ڊپٽي اٽارني جنرل ٻڌايو ته کيس جيل ۾ رکيو ويو آحي. جسٽس عامر فاروق چيو ته اهو اهم معاملو آهي، ان تي سنجيدگيءَ جو مظاهرو ڪيو وڃي، 4 چئن ورهين کانپوءِ اهو ڪيس ٿيو آهي، پر اڄ به اتي ئي آهي جتي چار سال اڳ هو. اسلام آباد هائيڪورٽ، پرڏيهي وزارت طرفان ڊاڪٽر عافيه جي آزادي بابت کنيل قدمن واري حڪومتي رپورٽ تي بي اعتمادي ظاهر ڪئي. عدالت، پرڏيهي وزارت کي 2 هفتن ۾ دستاويزن سان گڏ نئين رپورٽ جمع ڪرائڻ جو حڪم ڏنيدي جوائنٽ سيڪرٽري کي 10 فيبروري تي طلب ڪري ورتو.
وڌيڪ پڙهو
