ٿرڪول منصوبو سنڌ سرڪار جي محنت جو نتيجو آهي، سيد مراد علي شاهه

وڏي وزير سيد مراد علي شاهه چيو آهي ته ٿرڪول منصوبو سنڌ سرڪار جي محنت جو نتيجو آهي، اهو ملڪي توانائي ضرورت پوري ڪرڻ جو ضامن آهي، سنڌ سرڪار ڳالهيون نه پر ڪم ڪري ڏيکاريو آهي. وڏي وزير سيد مراد عيل شاهه جي صدارت ۾ ٿرڪول اينڊ انرجي بورڊ ٻاويهون جو اجلاس ٿيو. اجلاس ۾ بورڊ جي ميمبر ايم اين اي شازيه مري، توانائي واري صوبائي وزير امتياز شيخ، صلاحڪار مرتضيٰ وهاب، چيف سيڪريٽري ممتاز شاهه، پرنسپل سيڪريٽري ساجد جمال ابڙي، سيڪريٽري توانائي طارق شاهه ۽ ٻين شرڪت ڪئي. اجلاس ۾ لاڳاپيل اختيارين طرفان منصوبي جي  جاري ڪم بابت آگاهي  ڏني وئي. آگاهي ڏني وئي ته ٿرڪول بلاڪ ٽو تي 230 ميگاواٽ جي ٻن پاور پراجيڪٽ تي ڪم جاري آهي. ٻڌايو ويو ته هن وقت ٿرڪول مان 3 ڏهائي پنج جي،  ڊبليو ايڇ بجلي نيشنل گرڊ ۾ وڃي چڪي آهي. بريفنگ ڏني وئي ته فيز ٿري ۾ ٿر انرجي لميٽيڊ جي پاور پلانٽ تي 60 سيڪڙو ڪم مڪمل ٿي چڪو آهي، ٻئي منصوبا 2022 ۾ ڪم شروع ڪندا. ان موقعي تي وڏي وزير مراد علي شاهه  چيو ته ٿرڪول منصوبو سنڌ سرڪار جي محنت جو نتيجو آهي، هنن رڳو  ڳالهيون نه پر ڪم ڪيو آهي. هن چيو ته ٿرڪول ملڪي توانائي ضرورت پوري ڪرڻ جو ضامن آهي. ان موقعي تي توانائي وزير وزير امتياز شيخ آگاهي ڏيندي ٻڌايو ته مٽياري ۾ گرڊ اسٽيشن تي ڪم جاري آهي. وڏي وزير مراد علي شاهه چيو ته ٿرڪول مائنز مان نيو ڇور کان عمر ڪوٽ تائين ريلوي لائن ٺاهڻ جي ضرورت آهي. هن چيو ته ريل پٽڙي 105 ڪلو ميٽرن تي ٻڌل هوندي، اهو منصوبو 3 سئو ملين ڊالرن جو هوندو.

وڌيڪ پڙهو…