(انٽرنيشنل ڊيسڪ ) آمريڪا جي نئين چونڊيل صدر جو بائيڊن ۽ نائب صدر ڪمالا هيرس حلف کڻي پنهنجي دور جو آغاز ڪري ڇڏيو آهي. بائيڊن -هيرث دور جي شروعات ۾ سڀ کان دلچسپ ڳالهه سندن ڪابينا ۽ مک ٽيم آهي، جيڪا آمريڪي تاريخ جي سڀ کان وڌيڪ “گهڻ نسلي” ڪابينا ۽ ٽيم آهي، جنهن ۾ نه صرف گورا، ڪارا، ڏکڻ ايشيائي، عرب، لاطيني، اصلوڪا آمريڪي توڙي چيني نسل سان تعلق رکندڙ آمريڪي شهري شامل آهن. پر ان سان گڏوگڏ سندس ٽيم ۾ مسلمان، عيسائي، هندو، سک، ۽ ٻين مذهبن سان تعلق رکندڙ عورتون توڙي مرد شامل آهن. آمريڪا جي تاريخ جي پهرين عورت نائب صدرڪمالا هيرس جو پي گورو ۽ سندس ماءُ ڀارتي آهي جڏهن ته بائيڊن ٽيم ۾ شامل پينٽاگون ۽ دفاع واري کاتي جو سربراه ڪاري چمڙي وارو، هوملينڊ سڪيورٽي جو سربراه ڪيوبا سان تعلق رکندڙ لاطيني، ڪيبينيٽ سيڪريٽري مقامي آمريڪي ۽ ٽرانسپورٽ سيڪريٽري هڪ هم جنس پرست آهي. صدر بائيڊن جي ٽيم ۾ گهٽ ۾ گهٽ 20 ميمبر اهڙا آمريڪي آهن جيڪي ڀارتي خانداني پسمنظر رکن ٿا. جن ۾ عورتن جو انگ 13 آهي. انهن مان نيرا ٽنڊن جيڪا آمريڪا جي هڪ اهم ٿنڪ ٽينڪ سينٽر فارآمريڪن پروگريس جي هيڊ آهي، انکي هائوس مينيجمينٽ ايند بجيٽ جي ڊائريڪٽر جهڙي اهم عهدي تي مقرر ڪيو ويو آهي، جڏهن ته ڊاڪٽر وويڪ مرٿي کي ميڊيڪل اينڊ هيلٿ جي شعبي جو سربراه مقرر ڪيو ويو آهي. ڊاڪٽر مرٿي بائيڊن جي ڪورونا وبا ايڊوائزري بورڊ ۾ پڻ ڪم ڪري چڪو آهي.
صدر بائيڊن جي ٽيم ۾ ٽي ڪشميري عورتون پڻ شامل آهن. انهن مان عائشه شاه کي وائٽ هائوس جي ڊيجيٽل اسٽريٽجي بابت آفيس ۾ پارٽنرشپ مينيجر مقرر ڪيو ويو آهي. جڏهن ته سميرا فاضلي کي نيشنل اڪانومڪ ڪائونسل ۾ ڊپٽي ڊائريڪٽر مقرر ڪيو ويو آهي. سميرا فاضلي ان کان اڳ نيشنل اڪانومڪ ڪائونسل ۽ آمريڪي خزاني واري کاتي ۾ سينئر پاليسي ايڊوائزر طور ڪم ڪري چڪي آهي. فاضلي جي بائيڊن ٽيم ۾ نامزدگي واري خبر جڏهن سرينگر ۾ سندس خاندان تائين پهتي ته انهن جي چهرن تي خوشي جي لهر ڇائنجي وئي. سميرا جي چاچي رئوف فاضلي جو ان موقعي تي چوڻ هيو ته انهن لاءِاها ڪافي فخر جي ڳالهه آهي سندن نياڻي آمريڪي صدر جي مک ٽيم ۾ اهم عهدو ماڻيو آهي، سندس وڌيڪ چوڻ هيو ته توڙي جو جڏهن سميرا جا والدين آمريڪا لڏي ويا هئا سميرا ان وقت ڄائي به نه هئي پر تنهن هوندي به ڪشمير سان سندس لاڳاپو گهرو آهي. جڏهن ته هڪ ٻي ڪشميري عورت عزره ضيا کي اسٽيٽ ڊپارٽمينٽ ۾ سويلين سيڪيورٽي، ڊيموڪريسي اينڊ هيومن رائٽس بابت انڊر سيڪريٽري مقرر ڪيو ويو آهي. عزره ضيا صدر اوبامه جي دور ۾ عرب اسپرنگ بابت سندس صلاحڪار هئي.
نه رڳو اهو پر دلچسپ ڳاله اها آهي ته آمريڪي تاريخ ۾ پهريون ڀيرو ڀارتي شهرين کانسواءِ ڏکڻ ايشيا جي ٻين ملڪن سان تعلق رکندڙ آمريڪي شهري به بائيڊن-هيرس ٽيم ۾ اهم عهدن تي مقرر ڪيا ويا آهن. جن ۾ پاڪستان سان تعلق رکندڙ آمريڪي شهري علي زيدي ڊپٽي نيشنل ڪلائميٽ ايڊوائزر، سري لنڪا سان تعلق رکندڙ روهيني ڪوسولگو نائب صدر لاءِ ڊوميسٽڪ پاليسي ايڊوائزر، بنگلاديش سان تعلق رکندڙ آمريڪي شهري زين صديقي وائٽ هائوس جي ڊپٽي چيف آف اسٽاف مقرر ڪيا ويا آهي.
بائيڊن-هيرث ٽيم ۾ عرب ملڪن سان تعلق رکندڙ آمريڪي شهرين ۾ 15 سالن جو سياسي تجربو رکندڙ فلسطيني ريما ڊوڊن کي وائٽ هائوس لاءِ ڊپٽي ڊائريڪٽر مقرر ڪيو ويو آهي.
بائيڊن ۽ هيرس جي چونڊ مهم ۾ سينئر ايڊوائزر طور ڪم ڪندڙ ونئي ريڊي کي صدر جي تقرير لکڻ بابت ڊائريڪٽر ،ودانت پاٽيل کي اسسٽنٽ پريس سيڪريٽري، جڏهن ته سول رائٽ اٽارني ونيتا گپتا کي ڊپارٽمنٽ آف جسٽس ۾ ايسوسي ايٽ اٽارني جنرل جي عهدي لاءِ نامزد ڪيو ويو آهي.
آمريڪا جي فرسٽ ليڊي، ڊاڪٽر جل بائيڊن جي ٽيم ۾ پڻ ڏکڻ ايشيا سان تعلق رکندڙ ٽن عورتن، مالا اديگا کي پاليسي ڊائريڪٽر، گريما ورما کي ڊجيٽل ڊائريڪٽر ، سبرينه سنگهه کي ڊپٽي پريس سيڪريٽري مقرر ڪيو ويو آهي.
صدر بائيڊن جي اڳواڻي ۾ جڙندڙ نئين آمريڪي انتظاميا ۾ شامل گهڻ رخي ٽيم ان ڳالهه جي نشاندهي ڪري ٿي ته ٽرمپ دور ۾ نسل ۽ رنگ جي بنياد تي نفرتن جو ٻج پوکڻ جي جيڪا شروعات ڪئي وئي هئي، ان دور جي پڄاڻي ٿي رهي آهي.
