(انٽرنيشنل ڊيسڪ ) حلف برداري کان پوءِ عهدو سنڀالڻ جي ڪجھه ئي دير اندر صدر جو بائيڊن عوام سان پنهنجا وعده پورا ڪندي ڪيترائي اگزيڪيوٽو آرڊرز جاري ڪيا. انهن آرڊرز ۾ ڊبليو ايڇ او، پيرس ماحول معاهدي ۾ آمريڪا جي واپسي، ڪورونا وبا سان وڙهڻ توڙي مسلمان ملڪن تان سفري پابنديون ختم ڪرڻ شامل آهن. نه رڳو اهو پر صدر جو بائيڊن اقتدار ۾ اچڻ سان پهرين ڏينهن ئي صدر ٽرمپ جي ڪيترن ئي منصوبن تي عمل درآمد کان روڪي ڇڏيو. انهن منصوبن ۾ ميڪسيڪو سرحد تي ڀت قائم ڪرڻ توڙي غير ملڪي شهرين جي آمريڪا مان نيڪالي شامل آهي. صدر بائيڊن پنهنجي آفيس ۾ انهن آرڊرن تي صحيح ڪندي چيو ته “سڀ کان پهرين اسان کي واضح ۽ اثرائتا قدم کڻڻا پوندا”. بائيڊن جي ويجهن ساٿين جو ان سلسلي ۾ چوڻ آهي ته ايندڙ ڏهن ڏينهن ۾ صدر جو بائيڊن اهڙي قسم جا وڌيڪ آرڊر جاري ڪندو، جيڪي اڳوڻي صدر ٽرمپ جي پاليسي جي ابتڙ امن، دوستي، ويجهڙائپ، گهڻ نسلي ۽ گهڻ قوميت کي هٿي ڏيندا نه ئي تعصب، نفرت ۽ هڪ هٽي کي.چونڊ مهم دوران صدر جو بائيڊن عوام سان ڪيل واعدن مان ڪجھه واعده پورا ڪيا آهن، جن ۾ سڀ کان اڳ ڊيپورٽيشن (ملڪ مان نيڪالي) کي روڪڻ جو واعدو هيو.اڳوڻي آمريڪي صدر ٽرمپ پنهنجي دور ۾ غير قانون طور آمريڪا آيل ماڻهن جي فوري نيڪالي جي پاليسي کي اختيار ڪيو هو،جنهن کي صدر بائيڊن پنهنجي واعدي مطابق سئو ڏينهن تائين معطل ڪيو آهي. صدر مطابق سئو ڏينهن جي معطلي ڪنهن به قسم جي غير شفافيت ۽ ناانصافي کي ختم ڪرڻ لاءِ آهي. ساڳي طرح صدر ٽرمپ پنهنجي دور ۾ آرڪٽڪ ۾ تيل ۽ گئس جي منصوبي جي ڳولا لاءِ وائلڊ لائف پارڪ جي زمين ليز تي ڏني هئي، جنهن کي صدر جو بائيڊن رد ڪري ڇڏيو آهي.صدر جو بائيڊن جي ٽيم صحافين لاءِ هڪ پيغام پڻ جاري ڪيو آهي، جنهن ۾ صحافين کي ساراهيو توڙي ان جي عزت افزائي ڪئي وئي آهي. ان پيغام ۾ صدر جو بائيڊن جي پريس سيڪريٽري جو چوڻ هيو ته اهڙا موقعا ايندا ته حڪومت ۽ ميڊيا ڪنهن ڳالهه تي هڪجهڙو موقف نه رکندا پر تنهن هوندي به اسان هڪ ٻئي جي عزت ڪنداسين. ان جي ابتڙ ياد رهي ته صدر ٽرمپ جي ٽيم جا صحافين سان تمام خراب ورتاءُ رهيا آهن ۽ صدر ٽرمپ جي ٽيم طرفان ميڊيا کي “ڪوڙا” ۽ “نقلي” جي نالن سان سڏيو ويندو رهيو هيو.ڪورونا وبا بابت پنهنجي پاليسي واضع ڪندي صدر بائيڊن ڪورونا وبا سان فرت نموني وڙهڻ جو اعلان ڪيو آهي ۽ عزم ظاهر ڪيو آهي ته هُو ڪورونا خلاف دنيا جي ملڪن جي مدد ڪندو. نه رڳو اهو پر صدر ٽرمپ طرفان پيرس ماحولياتي معاهدي مان نڪرڻ جي اعلان کان پوءِ آمريڪا هن معاهدي تان هٿ کڻي ڇڏيا هئا. صدر بائيڊن پنهنجي صدارت جي پهرين ڏينهن پريس ماحول معاهدي ۾ آمريڪا جي شرڪت جو اعلان ڪيو آهي ۽ چيو آهي ته “صدر ٽمرپ نومبر ۾ پيرس معاهدي تان هٿ کنيو، اسان جي اچڻ جي ڪجھه ئي هفتن ۾ آمريڪا هڪ ڀيرو وري هن معاهدي ۾ شريڪ ٿيندو، جنهن جو مطلب ته آمريڪا صرف ٿوري عرصي لاءِ پيرس معاهدي کان ٻاهر رهيو هيو.
(ٽي آر ٽي ورلڊ جي ٿورن سان)
