وزيراعظم عمران خان سينيٽ جي چونڊن جي وڊيو معاملي جي جاچ جو فيصلو ڪري ڇڏيو. وزيراعظم عمران خان ايم پي ايز کان پئسا وٺڻ جي وڊيو معاملي جي جاچ لاءِ ٽه رڪني ڪميٽي جوڙي ڇڏي آهي. ڪميٽي ۾ سائنس ۽ ٽيڪنالاجي واري وفاقي وزير فواد چوڌري، انساني حقن واري وفاقي وزير شيرين مزاري ۽ وزيراعظم جي احتساب بابت صلاحڪار شهزاد اڪبر کي شامل ڪيو ويو آهي. ذريعن موجب ڪميٽي جاچ ڪندي ته وڊيو ۾ ڪير ڪير ملوث آهي ۽ پنهنجون سفارشون وزيراعظم کي پيش ڪندي. ڪميٽي وڊيو معاملي تي اليڪشن ڪميشن سان رابطو ڪري تجويز به ڏيندي، ملوث ماڻهن خلاف فوجداري ڪارروائي جي امڪانن بابت به سفارشون پيش ڪيون وينديون. ڪميٽي ملوث ماڻهن خلاف ڪيس نيب، ايف آءِ اي ۽ اينٽي ڪرپشن کي موڪلڻ تي به غور ڪندي. ٻئي طرف ڳجهي وڊيو منظر عام تي اچڻ کانپوءِ ڪي پي جي قانون واري وزير سلطان خان کي ڪابينا مان فارغ ڪرڻ جو نوٽيفيڪشن جاري ڪيو ويو آهي. وڏي وزير طرفان استعيفيٰ منظور ٿيڻ کانپوءِ ايڊمنسٽريشن کاتي پاران صوبائي وزير سلطان خان کي وزارت تان فارغ ڪرڻ جو نوٽيفڪيشن جاري ڪيو ويو آهي.
وڌيڪ پڙهو
