( انٽرنيشنل ڊيسڪ )
برما ۾ فوج طرفان اقتدار جو تختو اونڌو ڪرڻ جي ٻن هفتن کان پوءِ فوج خلاف ۽ جمهوريت جي حق ۾ مظاهرن جي هڪ ڀيرو ٻيهر شروعات ٿي وئي آهي. سومر ڏهاڙي برما جي سڀ کان وڏي شهر ينگون ۾ مظاهرو ڪندڙن جو وڏو اجتماع نظر آيو، جڏهن ته فوج جا وڏا اٽالا پڻ نظر آيا، جنهن سان ٻنهي وچ ۾ ڇڪتاڻ ۽ ڪريڪ ڊائون جو خطرو وڌي ويو. برما جي ميڊيا لائيو اسٽريم مطابق ماڻهن جو وڏو انگ شهر جي مختلف علائقن ۾ نظر آيو. واضح رهي ته ملڪ ۾ جاري انٽرنيٽ بليڪ آئوٽ پڻ ختم ٿي وئي آهي ۽ عالمي انٽرنيٽ تي نظر رکندڙ هڪ تنظيم مطابق ملڪ ۾ انٽرنيٽ هڪ ڀيرو ٻيهر بحال ٿي آئي پر ڪجھه استعمال ڪندڙن کي اڃا به پريشاني جو منهن ڏسڻو پئجي رهيو آهي. واضح رهي ته گذريل سال ٿيل چونڊن ۾ آنگ سن سوچي جي پارٽي نيشنل ليگ فار ڊيموڪريسي واضح اڪثريت سان سوڀاري ٿي هئي، جنهن تي فوج طرفان اليڪشن جي شفافيت تي سوال اٿاريا ويا هئا. هنن چونڊن کان پوءِ پهرين فيبروي تي نئين چونڊيل ميمبرن جو پارليماني اجلاس طلب ڪيو ويو هو پر فوج طرفان اقتدار تي قبضو ڪري سياسي اڳواڻن توڙي ٻين مخالفن کي نظر بند يا جيل موڪليو ويو آهي. اقتدار تي قبضي پٺيان مقصد ٻڌائيندي فوج جي ترجمان ڄاڻايو آهي ته انهن اقتدار تي قبضو “چونڊن ۾ فراڊ” سبب ڪيو آهي. ان سلسلي ۾ واضح هجي ته فوج طرفان انهن الزامن کي ثابت ڪرڻ لاءِ ڪي به واضح ثبوت پيش نه ڪيا ويا آهن. اليڪشن ۾ فراڊ واري الزام کي ملڪ جي اليڪشن ڪميشن طرفان پڻ رد ڪيو ويو آهي ۽ اليڪشن عملدارن مطابق چونڊن ۾ ڪنهن به قسم جي ڪا هير ڦير نه ٿي آهي.ملڪ جي فوج طرفان غير جمهوري طور تي اقتدار جو تختو اونڌو ڪرڻ جي عالمي برادري طرفان سخت مذمت ڪئي وئي آهي ۽ يورپي توڙي ٻين ملڪن برمي فوج کان تمام سياسي قيدين جي آزادي جي گهر ڪندي ملڪ جي سياسي نظام کي بحال ڪرڻ جو مطالبو ڪيو آهي. ساڳي طرح آمريڪا پڻ مذمت ڪندي صورتحال کي ڳڻتي جوڳي قرار ڏيندي برمي فوج جي ٽن اعليٰ اهلڪارن خلاف پابندين جو اعلان ڪيو آهي. نه رڳو اهو پر گڏيل قومن جي سيڪريٽري جنرل انتونيو گتريس برما ۾ هلندڙ صورتحال تي پڻ خدشو ظاهر ڪيو آهي. سيڪريٽري جنرل جي ترجمان طرفان جاري ٿيل هڪ بيان ۾ چيو ويو آهي ته “سيڪريٽري جنرل سڀني ميمبر ملڪن کي اها اپيل ٿو ڪري ته انساني حقن جي پاسداري ڪندي اظهار جي آزادي کي يقيني بڻايو وڃي”. ان جي ابتڙ چين ۽ روس طرفان اهڙي ڪنهن به قسم جو بيان جاري نه ڪيو ويو آهي ۽ ان معاملي کي برما جو “اندروني معاملو” قرار ڏنو آهي.ياد رهي ته برما ۾ هلندڙ ڪريڪ ڊائون جي نتيجي ۾ هن وقت تائين 400 ماڻهن کي حراست ۾ ورتو ويو آهي، جڏهن ته ڪيترائي ماڻهون نظر بند پڻ آهن. تازي صورتحال مطابق شهر ۾ وڌندڙ مظاهرن کي منهن ڏيڻ لاءِ فوجي گاڏين سميت ڪيتريون ئي واٽر ڪينز شهر جي مختلف چورنگين تي مقرر ڪيون ويون آهن.
الجزيره جي ٿورن سان
