(انٽرنيشنل ڊيسڪ )
عراق جي ڪردستان خطي ۾ واقع آمريڪي بيس تي راڪيٽ ذريعي حملا ڪيا ويا آهن، جنهن ۾ غير ملڪي سويلين ڪانٽريڪٽر مارجي ويو، جڏهن ته حملي جي نتيجي ۾ 9 ڄڻا زخمي پڻ ٿيا. اهڙي قسم جو حملو گذريل سال جو سڀ کان خطرناڪ حملو آهي، جنهن ۾ آمريڪا توڙي اتحادين کي نقصان رسيو هجي. آمريڪي اڏي تي راڪيٽ حملن جي شروعات سومر ڏهاڙي تي ٿي، جڏهن اربل شهر جي ڏکڻ کان مسلسل راڪيٽ حملا ڪيا ويا. هن حملي جي ذميواري هڪ ننڍي شيعا تنظيم اوليا الدام يعني “رت جا محافظ” قبول ڪئي آهي. انهي گروپ طرفان هڪ بيان جاري ڪيو ويو ته “قبضو ڪندڙ آمريڪي عراق يا ڪردستان جي ڪنهن به حصي ۾ محفوظ نه رهندا ۽ اسان انهن خلاف پنهنجون ڪارروايون جاري رکنداسين”. واضح رهي ته هن طرح جي حملن جي ذميواري اڪثر ننڍي ننڍي تنظيمن طرفان ورتي ويندي آهي پر سڪيورٽي ادارن جو چوڻ آهي ته هن قسم جون تنظيمون يا گروپ حذب الله يا اصيب الحق جو پاڇو آهن، جيڪي هنن طرفان ڪيل حملن جي ذميواري کڻڻ لاءِ تيار ڪيون وينديون آهن. هن حملي کان پوءِ ايران جي مبينا هٿ هجڻ بابت ڪجھه خبرون سامهون آيون پر اُهي تڏهن دم توڙي ويون، جڏهن ايران هن حملي ۾ ڪنهن به قسم جي هٿ هجڻ کي رد ڪندي چيو ته “ ايران لاءِ عراق جو استحڪام انتهائي اهم آهي ۽ ايران ڪنهن به قسم جي حملي يا اهڙي عمل جي سخت مخالفت ڪري ٿو، جنهن سان خطي جو امن متاٿر ٿئي.” هن حملي بابت تفصيل ٻڌائيندي اتحادي فوجن جي ترجمان وين مروٽو چيو ته ٽوٽل 14 راڪيٽ اربل ايئرپورٽ تي فائر ڪيا ويا، جنهن مان ٽي آمريڪي اڏي ويجهو ڪريا. راڪيٽ ڪرڻ سبب هڪ غير ملڪي ڪانٽريڪٽر جان جي بازي هارائي ويو. واضح هجي ته شهر جو ايئرپورٽ هڪ اهڙي هنڌ تي واقع آهي، جتي داعش خلاف اتحادي فوجن جو اڏو آهي.عراق طرفان داعش خلاف ويڙهه ۾ سوڀاري واري 2017ع واري اعلان کان پوءِ هن اڏي تي موجود اتحادي فوجن جي انگ ۾ گهٽتائي اچي وئي آهي ۽ انگ 3500 تائين رهجي ويو آهي، جنهن مان 2500 آمريڪي فوجي آهن.ٻئي پاسي وري آمريڪا طرفان هن حملي تي سخت ردعمل ڏسڻ ۾ آيو آهي. آمريڪي سيڪريٽري آف اسٽيٽ اينٿوني بلنڪن طرفان هڪ بيان جاري ڪيو ويو آهي،جنهن ۾ هُن جو چوڻ آهي ته “اسان کي هن راڪيٽ حملي تي سخت ڳڻتي آهي ۽ اسان ذميوارن کي سندن انجام تائين پهچائينداسين”. حملي جي نتيجي ۾ زخمي ۽ مارجي ويلن بابت ٻڌائيندي اينٿوني بلنڪن جو چوڻ هيو ته “شروعاتي رپورٽن مطابق هڪ سويلين ڪانٽريڪٽر جڏهن ته ڪيترائي اتحادي پڻ زخمي ٿيا آهن”. ساڳي طرح هن حملي جي عراقي صدر پڻ مذمت ڪئي ۽ چيو ته “اهڙو عمل مجرماڻو ۽ دهشتگردي تي ٻڌل آهي، جنهن سان خطي ۾ ڇڪتاڻ وڌي ويندي”. اهڙي ئي طرح ڪردش خطي جي وزيراعظم مسرور برزاني پڻ هن حملي جي مذمت ڪئي آهي.
الجزيره جي ٿورن سان
