اپوزيشن سينيٽ چونڊ لاءِ هر طريقو استعمال ڪري پئي، سينيٽ چونڊ ۾ حفيظ شيخ ڪامياب ٿيندو, وزيراعظم عمران خان

وزيراعظم عمران خان چيو آهي ته اپوزيشن سينيٽ چونڊ لاءِ هر  طريقو استعمال ڪري پئي، سينيٽ چونڊ ۾ حفيظ شيخ ڪامياب ٿيندو.وزيراعظم عمران خان سان ايم ڪيو ايم اڳواڻن ملاقات ڪئي، جنهن دوران سينيٽ اليڪشن بابت ڳالهيون ڪيون ويون. ملاقات بعد ميڊيا سان ڳالهائيندي وفاقي وزير امين الحق چيو ته ايم ڪيو ايم حڪومت جي سڀ کان وڏي اتحادي پارٽي آهي، وزيراعظم سان ملاقات دوران شهري سنڌ جي مسئلن تي ڳالهيون ٿيون. هن چيو ته وزيراعظم کان مطالبو ڪيو ته ڪراچي جي ترقياتي پيڪيج ۾ تيزي آندي وڃي ۽ 2022ع ۾ ٻيهر آدمشماري ڪرائي بجيٽ ۾ فنڊ رکيا وڃن. ان کان اڳ وزيراعظم عمران خان سان حفيظ شيخ ۽ عثمان بوزدار سميت مختلف پارليامينٽ ميمبرن الڳ الڳ ملاقاتون ڪيون. ملاقات دوران ڳالهائيندي عمران خان چيو ته اپوزيشن سينيٽ چونڊ لاءِ هر طريقو استعمال ڪري پئي. هن چيو ته هو شفاف چونڊ لاءِ اوپن بيلٽ جو حامي هو. سندس چوڻ هو ته سندن ميمبرن سان رابطا ڪيا پيا وڃن،  ڀلي رابطا ڪيا وڃن، پر هو متحد آهن. سندس چوڻ هو ته مخالف ڌر پيسن جي لالچ ڏي پئي، پر حفيظ شيخ ڪامياب ٿيندو. وزيراعظم عمران خان چيو ته مخالف ڌر پاران پئسا ۽ لالچ باوجود سينيٽ جي چونڊن ۾ ڪاميابي حاصل ڪئي ويندي. هن چيو ته سندن حڪومت جي پهرين ترجيح عام ماڻهو ۽ پوئتي پيل علائقا آهن. وزيراعظم عمران خان چيو ته پهريون ڀيرو پوئتي پيل علائقن کي وڌيڪ ترقياتي رٿائون ڏنيون پيون وڃن. هن چيو ته عوامي نمائندن پاران ٻڌايل عوامي مسئلن کي حل ڪيو ويندو..

وڌيڪ پڙهو…