سيد جلال محمود شاهه پاران افغانين کي سڃاڻپ ڪارڊ جاري ڪرڻ واري فيصلي جي مذمت

ايس يو پي سربراهه سيد جلال محمود شاهه وفاقي ڪابينا پاران ملڪ اندر رهندڙ افغانين کي سڃاڻپ ڪارڊ جاري ڪرڻ واري فيصلي جي مذمت ڪندي چيو آهي ته سنڌ ۾ غير قانوني طور رهندڙ سمورن ڌارين کي فوري طور پنهنجي ڏيھه واپس موڪليو وڃي. جاري ڪيل پنهنجي بيان ۾ سيد جلال محمود شاهه چيو ته وفاق پاران سنڌ سان هميشه ويساهه گهاتي ڪئي وئي آهي. هن چيو ته سنڌ جو عوام هميشه اهو مطالبو ڪندو رهيو آهي ته افغانين سميت سنڌ ۾ غير قانوني طور رهندڙ سمورن ڌارين کي فوري طور پنهنجي ڏيھه واپس موڪليو وڃي ڇو ته افغانين سميت سمورا غيرقانوني رهندڙ هتان جي وسيلن تي بار ۽ امن امان جي مسئلي ۾ رڪاوٽ بڻيل آهن. سندس چوڻ هو ته ڌارين کي سڃاڻپ ڪارڊ جاري ڪرڻ واري فيصلي تي حيرت ٿي آهي. سيد جلال محمود شاهه چيو  ته هو سمجهن ٿا ته سنڌ ۾ ڌارين جي آبادڪاري ۾ وفاقي حڪومت سان گڏوگڏ پيپلزپارٽي جي سرڪار پڻ برابر جي شريڪ آهي، جنهن جي مجرماڻي خاموشي، اقتدار جي حوس خاطر سنڌ جي قومي مفادن کي هميشه نيلام ڪيو آهي. هن چيو ته سنڌ سرڪار اقتدار جي اعليٰ ايوانن ۽ سي سي آءِ ۾ افغانين سميت غيرقانوني طور رهندڙ ڌارين جي ڏيھه واپسي لاءِ ڪڏهن به آواز ناهي اٿاريو. ايس يو پي سربراهه چيو ته پاڪستان جي قيام کان وٺي هڪ منظم سازش تحت سنڌ اندر ڌارين جي آبادڪاري جاري آهي ڪڏهن افغانستان ۾ ويڙهه جو جواز، ڪڏهن ڪشمير جي حالتن جو حوالو ۽ ڪڏهن وري مسلمانن جو حوالي ڏنو وڃي ٿو پر ان حقيقت کان ڪير به انڪار نٿو ڪري سگهي ته سنڌ اندر امن امان تباھ ٿيڻ جو هڪ وڏو سبب به اهي غيرقانوني ڌاريا آهن. سيد جلال محمود شاهه جو چوڻ هو ته سنڌ اندر رهندڙ افغانين سميت سمورن ڌارين کي جاري ڪيل سڃاڻپ ڪارڊ، ڊوميسائل فوري طور تي رد ڪيا وڃن ۽ کين فوري طور پنهنجي ڏيھ واپس موڪلڻ جو بندوبست ڪيو وڃي. ٻئي طرف سنڌ يونائيٽيڊ پارٽي جي جنرل سيڪريٽري روشن علي ٻرڙو بيان جاري ڪيو آهي ته پارٽي جي مرڪزي جنرل ڪائونسل جو اجلاس 20 ۽ 21 مارچ تي منجهند 3 وڳي سن ۾ منعقد ٿيندو جنهن ۾ اڳواڻ شرڪت ڪندا.

وڌيڪ پڙهو…