شاگرد عرفان جتوئي جي واقعي تي ڏک ٿيو آهي، هو وارثن سان گڏ آهي،آغا سراج

سنڌ اسيمبليءَ جي اسپيڪر آغا سراج دراني چيو آهي شاگرد عرفان جتوئي جي واقعي تي ڏک ٿيو آهي، هو وارثن سان گڏ آهي، سندن هر ممڪن مدد ڪئي ويندي.اسپيڪر آغا سراج دراني ڳڙهي ياسين  ويجهو ڳوٺ روشن خروس پهچي شاگرد عرفان جتوئي جي وارثن سان تعزيت ڪئي. شاگرد عرفان جتوئي جي والد روشن،  اسپيڪر آغا سراج دراني کي واقعي بابت آگاهي ڏني ۽ چيو ته پٽ کي حيدرآباد پوليس يونيورسٽي مان کنڀي 25 لکن جي گهر ڪئي ۽ پيسا نه ڏيڻ تي هڪ سازش تحت ڪوڙي مقابلي ۾ ماريو ويو. ان موقعي تي ميڊيا سان ڳالهائيندي اسپيڪر آغا سراج دراني چيو ته واقعي تي کيس ڏک ٿيو آهي، مصروفيتن سبب هو وقت تي نه اچي سگهيو. سندس چوڻ هو ته هو شاگرد جي وارثن سان گڏ آهي، سندن هر ممڪن مدد ڪئي ويندي. اسپيڪر آغا سراج دراني چيو ته واقعي  بابت وڏي وزير سان ڳالهايو آهي، ڪيس  ڪورٽ ۾ هلي رهيو آهي، هاڻي هو ان تي وڌيڪ نٿو ڳالهائي سگهي. هن چيو ته بروهي ڪاڪيپوٽا تڪرار ختم ٿيڻ سان امن بحال ٿيندو، سندس ڪوشش آهي ته علائقي ۾ امن امان جي صورتحال بحال ٿئي. سندس چوڻ هو ته صالح پٽ ۾ قتل ٿيل صحافي اجي لالواڻي واقعي جي هو سخت لفظن ۾ مذمت ڪري ٿو،  جوابدارن کي گرفتار ڪرڻ گهرجي. اسپيڪر آغا سراج دراني چيو ته حق سچ لکڻ تي صحافين کي قتل ڪيو پيو وڃي، صحافين کي دٻائڻ ملڪ کي ڪمزور ڪرڻ برابر آهي. ان موقعي تي غزن ٿهيم، عبدالحق ابڙو، جاويد دراني، بابو خان دراني ۽ ٻيا ساڻس گڏ هئا.

وڌيڪ پڙهو…