سنڌ هاءِ ڪورٽ، ڪورنگي ۽ ملير ضلعي ۾ خراب پاڻي ذريعي سبزيون پوکڻ بابت درخواست تي ضلعي انتظاميه کان ڏهن ڏينهن اندر ڪارروائي تي ٻڌل رپورٽ طلب

سنڌ هاءِ ڪورٽ، ڪورنگي ۽ ملير ضلعي ۾ خراب پاڻي ذريعي سبزيون پوکڻ بابت درخواست تي ضلعي انتظاميه کان ڏهن ڏينهن اندر ڪارروائي تي ٻڌل رپورٽ طلب ڪري ورتي. ڪيس جي ٻڌڻي دوران ڊپٽي ڪمشنر ملير طرفان جواب جمع ڪرايو ويو. اسسٽنٽ ايڊوڪيٽ جنرل ٻڌايو ته عدالت جي حڪم تي مڪمل عمل ڪيو ويو آهي. درخواست ڏيندڙ چيو ته عدالتي حڪم تي عمل نه پيو ڪيو وڃي. ميونسپل ايڊمنسٽريٽر اختيارين عدالت کي ٻڌايو ته منع ڪرڻ باوجود ماڻهو اچي خراب پاڻي تي سبزي پوکين ٿا. ان تي جسٽس محمد علي مظهر رمارڪس ڏيندي چيو ته اوهان جو ڪم روڪڻ آهي، انهن کي ڇو نٿو روڪيو وڃي.؟ جسٽس محمد علي مظهر رمارڪس ڏيندي چيو ته هڪ تفصيلي رپورٽ ڏني وڃي ته خراب پاڻي تي پوکيل سبزيون ختم ڪيون ويون آهن. ميونسپل ايڊمنسٽريٽر اختيارين عدالت کي ٻڌايو ته 17 مارچ تي خراب پاڻي تي پوکيل سبزيون ختم ڪيون، ان جون تصويرون به موجود آهن. درخواست ڏيندڙ چيو ته آفيسر پنهنجي ڪمرن مان ٻاهر نڪرن ئي نٿا. عدالت درخواست ڏيندڙ کان پڇاڻو ڪيو ته خراب پاڻي تي ڪهڙيون سبزيون ڪيون وڃن ٿيون. درخواست ڏيندڙ ٻڌايو ته خراب پاڻي ذريعي گوبي، موري ۽ ٻيون سبزيون پوکيون وڃن، ڪميٽي جوڙي وڃي جيئن حقيقتون سامهون اچي سگهن. عدالت ملير ۽ ڪورنگي ضلعي انتظاميه کان ڏهن ڏينهن اندر ڪارروائي تي ٻڌل رپورٽ طلب ڪندي ٻڌڻي ملتوي ڪري ڇڏي.

وڌيڪ پڙهو…