ايف آءِ اي جي چالان موجب شهباز شريف مني لانڊرنگ جو ماسٽر مائينڊ آهي, شهزاد اڪبر

گهرو ۽ احتساب بابت صلاحڪار شهزاد اڪبر چيو آهي ته ايف آءِ اي جي چالان موجب شهباز شريف مني لانڊرنگ جو ماسٽر مائينڊ آهي. گهرو ۽ احتساب واري صلاحڪار شهزاد اڪبر پريس ڪانفرنس ڪندي چيو ته ميگا مني لانڊرنگ ڪيس حل ڪرڻ لاءِ ڀرپور ڪوششون ڪيون وينديون ۽ بنا نالي اڪائونٽن جو چالان به پيش ڪيو ويو آهي، جنهن ۾ حيران ڪندڙ ڳالهيون سامهون آيون آهن. هن چيو ته 4 هزار 300 ٽرانزيڪشن جا دستاويز هئا ۽ ڪيس اڳوڻي وڏي وزير ۽ سندس خاندان خلاف آهي، شهباز شريف مٿان مني لانڊرنگ جو ڏوهه ثابت ٿي چڪو آهي ۽ ايف آءِ اي جي چالان موجب مخالف ڌر جو اڳواڻ مني لانڊرنگ جو ماسٽر مائينڊ آهي. شهزاد اڪبر چيو ته اڳوڻي ناڻي واري وزير اسحاق ڊار بنا نالي اڪائونٽس کوليا ۽ مني لانڊرنگ 28 اڪائونٽن ذريعي ڪئي وئي، اهي ان وقت استعمال ٿيا جڏهن شهباز شريف وڏو وزير هو. هن چيو ته رمضان شگر ملز جي ننڍڙن ملازمن جي نالي تي اڪائونٽ کوليا ويا، انهن ملازمن جون پگهارون 5 هزار کان 30 هزار رپيا آهن، انهن گهٽ پگهارن واري ملازمن جي اڪائونٽن ۾ اربين رپيا آيا. وزيراعظم جي صلاحڪار چيو ته شريف خاندان ايف آءِ اي جي جاچ ۾ سهڪار نه ڪيو، وڏي رقم چور جي اڪائونٽن ۾ منتقل ڪئي وئي، جڏهن ته 2015ع ۾ چپڙاسي جي موت کانپوءِ به اڪائونٽ هلندو رهيو. هن چيو ته پارٽي فنڊ لاءِ رقم هئي ته پوءِ چورن جي اڪائونٽن ۾ ڇو منتقل ڪئي وئي، اڪائونٽ کولڻ جو هڪ طريقو پڻ آهي. شهزاد اڪبر چيو ته ڪجهه نامزد جوابدار ملڪ کان ٻاهر آهن، قطعي چالان جمع ناهي ڪرايو ويو آهي، 16 ارب رپين کان وڌيڪ جي مني لانڊرنگ ڪئي وئي، ڪيس ۾ اڳوڻي وڏي وزير ۽ سندس خاندان خلاف ڪيس داخل ڪيو ويو آهي. گهرو ۽ احتساب بابت صلاحڪار چيو ته ڪيس ۾ نامزد جوابدار سلمان شهباز روپوش آهي، 64 صفحن کان وڌيڪ ڪيس جي چالان ۾ 4 هزار کان وڌيڪ شاهديون ۽ 100 کان وڌيڪ شاهد شامل آهن.

.وڌيڪ پڙهو…