ملڪ لاءِ فيصلائتو وقت آهي، عمران خان

اڳوڻي وزيراعظم ۽ تحريڪ انصاف جي چيئرمين عمران خان چيو آهي ته ملڪ لاءِ فيصلائتو وقت آهي، هو سياست نه پر جهاد ڪري رهيو آهي، جن ملڪ کي ڦريو، اهي سڌارن جي ڳالهه ٻيا ڪن، آصف زرداري طرفان نيب سڌارا ڪرڻ قيامت جي نشاني آهي، وڏا ڌاڙيل وڏن عهدن تي ويهي هڪٻئي کي اين آر و ڏئي رهيا آهن، زرداري، شهباز ۽ فضل الرحمان آمريڪا سان گڏجي سازش ذريعي حڪومت ڪيرائي، جيڪي سازش کي روڪي پئي سگهيا، انهن کي ٻڌايو ته ڏکيائين سان معيشت سنڀالي آهي، حڪومت وئي ته وڏو نقصان ٿيندو، پر افسوس ڪجهه به نه ٿيو،. اٽڪ ۾ جلسي کي خطاب ڪندي عمران خان چيو ته جڏهن عوام کيس اقتدار ۾ آندو ته واعدو ڪيو ته نه جهڪندو نه ئي قوم کي ڪنهن آڏو جهڪڻ ڏيندو. هن چيو ته هيءَ حقيقيت آزادي جي جنگ آهي، هو سياست نه پر جهاد ڪري رهيو آهي. عمران خان چيو ته زرداري، شهباز ۽ فضل الرحمان بائيڊن انتظاميا سان گڏجي سندن حڪومت ڪيرائي ڇڏي. هن چيو ته جيڪي سازش کي روڪي پئي سگهيا، انهن کي ٻڌايو ته ڏکيائين سان معيشت سنڀالي آهي، حڪومت وئي ته وڏو نقصان ٿيندو، پر افسوس ڪجهه به نه ٿيو. اڳوڻي وزيراعظم چيو ته قوم امپورٽڊ حڪومت کي تسليم ڪرڻ لاءِ تيار ناهي، هو آمريڪا جي غلامي نه ڪندا. عمران خان چيو ته جن ملڪ کي ڦريو، اهي سڌارن جي ڳالهه ٻيا ڪن، آصف زرداري طرفان نيب سڌارا ڪرڻ قيامت جي نشاني آهي. اڳوڻي وزيراعظم چيو ته شهبازشريف تي اربين رپين جا ڪرپشن ڪيس آهن پر کيس اين آر او ملي رهيو آهي، نوازشريف جي ڌيءَ به سزا ٻڌايل آهي پر کيس وزيراعظم وارو پروٽوڪول ملي رهيو آهي، سزا ٻڌايل ۽ ڀڳوڙي شخص سان وفاقي ڪابينا لنڊن ۾ وڃي ملاقات ڪري رهي آهي. عمران خان چيو ته 20 مئي کانپوءِ جڏهن به هو سڏ ڏيندو ته سڀني کي نڪرڻو آهي، ڪنهن کي به خوف نه هجڻ گهرجي، اسلام آباد ۾ سندن تحريڪ  اليڪشن جي اعلان تائين جاري رهندي. اڳوڻي وزيراعظم چيو ته زرق ۽ موت الله جي هٿ آهي ته پوءِ ڊپ ڪهڙي شيءِ جو آهي، چورن ۽ ڌاڙيلن کان آزادي ماڻڻي آهي.

وڌيڪ پڙهو..