ملڪ جي سياسي توڙي فوجي قيادت ڪشمير جي حريت اڳواڻ ياسين ملڪ کي سزا جي مذمت ڪئي آهي. وزيراعظم شهبازشريف سماجي رابطن واري ويب سائٽ ٽوئٽر تي ٽوئٽ ڪندي چيو ته اڄ ڀارتي جمهوريت ۽ انصاف جي نظام لاءِ ڪارو ڏينهن آهن. هن چيو ته ڀارت ياسين ملڪ کي جسماني طور قيد ڪري سگهي ٿو پر سندس آزاديءَ واري تصور کي قيد نه ٿو ڪري سگهجي. وزيراعظم چيو ته ياسين ملڪ کي عمر قيد جي سزا ڪشميرين جي جدوجهد ۾ نئين تحريڪ پيدا ڪندي. پرڏيهي وزير بلاول ڀٽو زرداري ٽوئٽ ذريعي ڪشميري حريت اڳواڻ ياسين ملڪ کي سزا جي مذمت ڪئي. سندس چوڻ هو ته ڀارت ڪڏهن به ڪشميرين جي حق خود اراديت وارو آواز دٻائي نه ٿو سگهي. لاول ڀٽو زرداري چيو ته پاڪستان ڪشميري ڀيڻ ڀائرن سان گڏ بيٺل آهي، سندس حمايت جاري رکي ويندي. ڊي جي آءِ ايس پي آر ميجر جنرل بابر افتخار ٽوئٽ ڪندي چيو ته پاڪستان ڪوڙن الزامن تي ياسين ملڪ کي ٻڌايل عمر قيد جي سزا جي سخت لفظن ۾ مذمت ڪري ٿو. هن چيو ته اهڙا غيرقانوني قدم ڪشميري عوام جي جدوجهد وارو جذبو گهٽائي نه ٿا سگهن. پاڪ فوج جي ترجمان چيو ته پاڪستان گڏيل قومن جي ٺهرائن موجب حق خوداراديت جي جدوجهد ۾ ڪشميرين سان گڏ آهي….
