ڀارتي وزيرن طرفان نبي ڪريم حضرت محمد مصطفيٰ صلي الله عليه جي شان ۾ گستاخي واري عمل خلاف ننگر پارڪر ۽ شهدادپور ۾ شٽر بند هڙتال ڪئي وئي، جڏهن ته مختلف شهرن ۾ ريليون ڪڍيون. ننگرپارڪر ۾ اھلسنت جي سڏ تي مودي سرڪار جي گستاخ ترجمانن نوپور شرما ۽ نورپن ڪمار خلاف شٽر بند ھڙتال ڪري جامع مسجد بريلوي کان پريس تائين مولانا عبدالغفار بروھي ۽ مولوي الھه بخش ٿيٻو جي اڳواڻي ۾ پريس ڪلب تائين احتجاجي ريلي ڪڍي مودي سرڪار خلاف سخت نعريبازي ڪئي. شهدادپور ۾ توهين رسالت خلاف شٽر بند هڙتال ڪئي وئي جنهن دوران شاهي بازار، صرافه بازار، ڪريانه مرچنٽ، شوز بازار سميت شهر جا سمورا اهم ڪاروبار مرڪز بند آھن. شهر جي مذهبي پارٽين ۽ سياسي سماجي اڳواڻن، واپارين تنظيمن ۽ شھرين ريلي اسٽيشن چوڪ کان پريس ڪلب تائين ريلي ڪڍي وئي جڏهن ته مک چوڪن چوراهن تي سخت گرمي سبب سبيل شربت جون ڪئمپون قائم ڪيون. قمبر ۾ جي يو آءِ جي سڏ تي بي جي پي جي عورت اڳواڻ نپور شرما طرفان توھين رسالت واري بيان خلاف حافظ عزير جاگيراڻي ۽ مولانا عبدالرزاق سولنگي جي اڳواڻي ۾ ھٿن ۾ بينر ۽ پلي ڪارڊ کڻي احتجاجي ريلي ڪڍي شهر جو گشت ڪيو. نصيرآباد ۾ جماعت اھلسنت جي سڏ تي نبي ڪريم ﷺ جن جي شان ۾ ڀارتي انتھاپسندن پاران ڪيل بي حرمتي خلاف مولوي مفتي خليل احمد چنه، مولوي علي اڪبر ڪانڌڙو ۽ مولوي غلام شبير ساند جي اڳواڻيءَ ۾ نوناري محلي کان پريس ڪلب تائين ھٿن ۾ بينر ۽ پلي ڪارڊ کڻي احتجاجي ريلي ڪڍي. ٽنڊي غلام علي ۾ به جميت علماءُ اسلام جي ڪارڪنن حاجي عرفان احمد کٽي ۽ مولوي قادر ڏنو ميمڻ جي اڳواڻي ۾ مدرسه دارالعوم تعليم اسلام کان پريس ڪلب تائين احتجاجي ريلي ڪڍي ڀارتي وزير خلاف سخت نعريبازي ڪئي. ٺاروشاهه ۾ جماعت اسلامي جي ڪارڪنن ۽ شھرين توهين رسالت خلاف حافظ مصعب ڏھراج، مولانا ھاشم لاشاري ، ذيشان ڏھراج ۽ مولانا عبيدالله سولنگي جي اڳواڻي ۾ ريلي ڪڍي شھر جي مختلف چوڪن کان ٿيندي پريس ڪلب پهتي جتي سخت نعريبازي ڪئي وئي. ان موقعي تي اڳواڻن خطاب ڪندي چيو ته ڀارتي انتھا پسند تنظيم بي جي پي جي وزير پاران نبي ڪريم ﷺ جن جي شان ۾ گستاخي ڪري سڄي دنيا جي ڪروڙين مسلمانن جي دل آزاري ڪئي آهي جنهن جي هو سخت لفظن ۾ مذمت ڪن ٿا. سندن چوڻ هو ته هو ناموس رسالت تي جان قربان ڪرڻ لاءِ به تيار آهن ڀارتي انتھا پسند پنھنجون ڪريل حرڪتون بند ڪن، ٻي صورت کين منهن ٽوڙ جواب ڏنو ويندو.
