سپريم ڪورٽ دعا زهرا جي حوالگي بابت ڪيس خارج ڪري ڇڏيو

سپريم ڪورٽ دعا زهرا جي حوالگي بابت ڪيس خارج ڪري ڇڏيو، عدالت رمارڪس ڏيندي چيو آهي ته ڇوڪري پاڻ چوي ٿي ته کيس اغوا ڪيو ويو آهي ته ڪيس ئي ختم ٿي ويو آهي. سپريم ڪورٽ ڪراچي رجسٽري ۾ دعا زهرا بازيابيءَ ڪيس ۾ سنڌ هاءِ ڪورٽ جي فيصلي خلاف والدين اپيل تي ٻڌڻي ڪئي هئي. دعا  زهرا جا والدين عدالت ۾ پيش ٿيا ۽ چيو ته سندن ڌيءُ سان 5 منٽ ملاقات ٿي، وڪيل ٻڌايو ته ڪيس ۾ ميڊيڪل بورڊ ناهي جوڙيو ويو. عدالت رمارڪس ڏيندي چيو ته اوهان جي درخواست تي ڇوڪري کي آندو ويو ۽ مرضي پڇي وئي، سنڌ هاءِ ڪورٽ  وڪري کي پنهنجي مرضي سان وڃڻ جي اجازت ڏني هاڻي اوهان ڇا ٿا چاهيو ؟ ان معاملي ۾ چائلڊ ميريج جي ڳالهه سمجهه ۾ اچي ٿي پر اغوا جي دعويٰ سمجهه ۾ نه ٿي اچي، ڇوڪري ٻن عدالتن ۾ پنهنجي مرضي سان وڃڻ جو بيان ڏئي چڪي آهي. جسٽس سجاد علي شاهه رمارڪس ڏيندي چيو ته ٻن عدالتن ۾ بيان به ٿي ويا آهن اوهان کي ڪهڙا مسئلا آهن جڏهن ڇوڪري پاڻ بيان ڏئي رهي آهي، جيڪڏهن توهان سان ملي به چوي ته هو مڙس ڏانهن وڃڻ چاهي ٿي ته پوءِ اوهان ڇا ڪندا ؟ دعا زهرا جو والد عدالتي سوال تي ڪو تسلي بخش جواب نه ڏئي سگهيو.  سپريم ڪورٽ ريمارڪس ڏيندي چيو ته الله ٻار کي شروع ۾ ئي آزاد پيدا ڪيو آهي، هو سندن والدين جو ڏک سمجهي سگهن ٿا پر ڇوڪري جو بيان ٿي چڪو آهي،  اوهان ڪنهن تي الزام نه ٿا هڻي سگهيو ته ساڻس زبردستي ڪئي وئي آهي، اغوا ته ثابت ئي نه ٿو ٿئي. جسٽس محمد علي مظهر ريمارڪس ڏيندي چيو ته شادي جي حيثيت ته چئلينج ته صرف ڇوڪري ئي ڪري سگهي ٿي، قانون ته واضح آهي، سنڌ جي قانون موجب به نڪاح ختم نه ٿو ٿئي،  هو ڇوڪري سان زبردستي نه ٿا ڪري سگهن، ڪهڙيون ڳالهيون هلي رهيون آهن ته اوهان جو فرقو  ۽ ان جو فرقو ڌار ڌار آهي.