وزيراعظم شهباز شريف جولاءِ جي مهيني ۾ لوڊشيڊنگ وڌڻ جو اشارو ڏئي ڇڏيو

وزيراعظم شهباز شريف جولاءِ جي مهيني ۾ لوڊشيڊنگ وڌڻ جو اشارو ڏئي ڇڏيو. اتحادي پارٽين جي قومي اسيمبلي ميمبرن کي خطاب ڪندي وزيراعظم چيو ته عوام مهانگائي کي منهن ڏئي رهيو آهي، اميرن وٽان  2 سئو ارب جمع ٿيڻ جي اميد آهي، پاڪستان ڏيواليَ ٿيڻ کان بچي ويو آهي، جلد ئي آءِ ايم ايف سان معاهدو ٿي ويندو. وزيراعظم چيو ته پي ٽي آءِ حڪومت آءِ ايم ايف جون سخت شرطون قبول ڪيون هيون. هن چيو ته جولاءِ ۾ لوڊشيڊنگ وڌي سگهي ٿي، ڇاڪاڻ ته ان لاءِ گئس جا جهاز ناهن مليا، تنهن باوجود هو ڪوششون ڪري رهيا آهن. سندس چوڻ هو ته دنيا ۾ ڪوئلو مهانگو ٿي ويو پاڪستان جا اربين ڊالر ڪوئلو درآمد ڪرڻ تي خرچ ٿيو وڃن ٿا، تمام جلد افغانستان مان ڪوئلو اچڻ شروع ٿي ويندو، جنهن سان 2 ارب ڊالر جي بچت ٿيندي ڇاڪاڻ ته افغانستان مان ڪوئلو ڊالرن ۾ نه پر رپين ۾ خريد ڪيو ويندو. وزيراعظم چيو ته چئلينجز ايندا رهندا پر هو پر اڳتي وڌندا رهندا، دوست ملڪن کان سيڙپڪاري ۽ واپار ڪندا جنهن سان ڪشڪول جو دورو ختم ٿي ويندو، اتحادي حڪومت تبديلي آڻڻ گھرجي. وزيراعظم شهباز شريف وڌيڪ چيو ته حڪومت خواجا آصف جي سربراهي ۾ افغانستان مان ڪوئلو گهرائڻ لاءِ ڪميٽي جوڙي وئي آهي.

وڌيڪ پڙهو…