جيڪي حڪمران مٿن مڙهيل آهن اهي 30 ورهين کان چوري ڪري رهيا آهن: عمران خان

پاڪستان تحريڪ انصاف جي چيئرمين عمران خان چيو آهي ته مڃيل ڪرپٽ ماڻهو مٿن مڙهيا ويا آهن. اسلام آباد ۾ ورڪرز ڪنوينشن کي خطاب ڪندي پي ٽي آءِ چيئرمين عمران خان چيو ته جيڪي حڪمران مٿن مڙهيل آهن اهي 30 ورهين کان چوري ڪري رهيا آهن، هنن ايندي ئي عوام تي مهانگائي جو بار وجهي ڇڏيو، جيڪڏهن ملڪ کي تباهه ڪرڻو آهي ته چور ۽ ڦورن کي مڙهيو وڃي. هن چيو ته جوابدار ڪڏهن به جج نٿو ٿي سگهي، پيٽرول، بجلي، گيس سڀ مهانگو ڪيو ويو آهي، کين پنهنجي مستقبل لاءِ نڪرڻو پوندو ۽ 2 جولاءِ تي اسلام آباد جي پريڊ گرائونڊ ۾ جلسو ڪري ثابت ڪندا ته هو زنده قوم آهن، 2 جولاءِ تي تاريخي جلسو ڪيو ويندو. عمران خان چيو ته ڪرپٽ ماڻهن حڪومت ۾ ايندي ئي پنهنجا ڪيس ۽ نيب کي ختم ڪري ڇڏيو، نيب ترميم ذريعي 1100 ارب رپين جي ڪرپشن جا ڪيس ختم ڪيا ويا. اڳوڻي وزيراعظم پي ٽي آءِ چيئرمين عمران خان چيو ته سندن دور ۾ 2 ورهين ۾ ايڪسپورٽ 70 سيڪڙو وڌي وئي، مٿن آءِ ايم ايف جو غلام هجڻ جو الازم مڙهيو ويو ۽ پاڻ آمريڪا سان سازش ڪري چونڊيل حڪومت جو تختو اونڌو ڪيو ويو.