سنڌ جي مختلف شهرن ۾ برسات جو سلسلو وقفي وقفي سان جاري آهي، وڄ ڪرڻ سبب 3 ڄڻا حياتيون وڃائي ويٺا آهن. سنڌ جي راڄڌاني ڪراچي ۾ اڄ به ڪٿي تيز ته ڪٿي هلڪي برسات جو سلسلو وقفي وقفي سان جاري آهي. شهر جي مختلف علائقن ۾ وسڪاري سبب روڊ رستا پاڻي ۾ ٻڏي ويا آهن. لاڳيتي برسات سبب ندين ۽ نالن ۾ چاڙهه اڇي وئي آهي، جيڪي اوور ٽاپ ٿيڻ لڳا آهن. ڪورنگي ندي ۽ ڪاز وي ٻئي ڏينهن به کلي نه سگهيا آهن، جنهن سبب شهرين کي سخت ڏکيائين کي منهن ڏيڻو پئجي رهيو آهي. سکر ۽ ڀرپاسي ۾ هڪ ڀيرو ٻيهر برسات بعد موسم خوشگواري ٿي وئي آهي، جڏهن ته برسات پوندي ئي بجلي بند ٿي وئي. حيدرآباد ۽ ڀرپاسي وارن علائقن ۾ وقفي وقفي سان تيز برسات جو وسڪارو جاري آهي، جڏهن گذريل ڏينهن کان بجلي بند هجڻ ڪري شهري ڏکيائين کي منهن ڏيڻ تي مجبور آهن. ڄامشوري ۽ ڪوٽڙي ۾ برسات جو سلسلو وقفي وقفي سان جاري آهي، جڏهن اڪثر علائقن ۾ گوڏي جيڏو پاڻي بيٺل آهي. بدين ۾ گذريل چئن ڏينھن کان ھلڪي ۽ تيز برسات جو سلسلو وقفي وقفي سان جاري آهي. برساتن سبب مواصلاتي نظام ڊانوان ڊول ٿي ويو، جڏهن ته روڊن تي پاڻي تلاءَ جو ڏيک ڏئي رهيو آهي. ڪڍڻ ۾ گج گوڙ سان برسات جو سلسلو وقفي وقفي سان جاري آهي، جنهن سبب وڄ ڪرڻ جي نتيجي ۾ ٻه ڄڻا حياتيون وڃائي ويٺا. وڄ ڪرڻ سبب ڳوٺ جانجھو دل ۾ عبدالمجيد ۽ ڳوٺ جمن مڙھو ۾ خدا بخش ملاح فوت ٿي ويا، جنهن سبب سندن گهرن ۾ عيد جون خوش ماتم ۾ تبديل ٿي ويو. ٽنڊوباگو شھر ۽ ڀرپاسي وارن علائقن ۾ وقفي وقفي سان وسڪارو جاري آهي. برسات سبب مرچ، ڦٽي ۽ ٽماٽن جي فصل کي ڪاپاري ڌڪ رسو آهي. ڊرينج سسٽم ناڪارا ٿيڻ سبب گندو پاڻي گهرن ۾ ڪاهي پيو آهي. نندي، کوسڪي ۽ ڀرپاسي واري علائقي ۾ تيز برسات وقفي وقفي سان جاري آهي. نندي ويجهو ڳوٺ علي مراد مهر اڻپوٽو ۾ وڄ ڪرڻ سبب نوجوان ڌنجي ڪولهي فوت ٿي ويو. ميرپورماٿيلي ۽ ڀرپاسي ۾ طوفاني برسات بعد موسم خوشگوار ٿي وئي، جڏهن ته روڊن تي گوڏي جيترو پاڻي بيهڻ سبب عوام گهرن تائين محدود ٿي ويو. فريدآباد سميت ڪاڇي جي مختلف ڳوٺن ۾ گذريل پنجن ڏينهن کان هلندڙ وقفي وقفي سان هلندڙ برسات بعد موسم خوشگوار ٿي وئي. ڪاڇي جي کيرٿر جي جابلو پٽي ۾ برسات سبب مختلف نئيون مزراڻي، ٻوري، دلان ۽ ٻيون نئيون وهي اچڻ سبب ڪاڇي واسين چهرا مرڪي پيا آهن. فريدآباد ۾ انتظاميا جي نااهلي سبب برسات جو پاڻي نيڪال نه ٿيڻ سبب بس اسٽاپ، لال شاھ چوئڪ، خاصخيلي، کوسا، عباسي پاڙن سميت شهر جي مختلف علائقن ۾ گوڏي جيڏو پاڻي بيهجي ويو آهي. جاتي ۽ ڀرپاسي جي علائقن ۾ ڇھن ڏينھن کان وقفي وقفي سان ھلندڙ برسات جو سلسلو جاري آهي، برسات سبب ھر ھنڌ گوڏي جيڏو پاڻي بيٺل آهي. برسات سبب سامونڊي پٽي جي ڳوٺن جو شھرن سان رابطو ڪٽجي ويو آهي. يوسي مڙھو بولاخان ۽ شاھڪپور ۾ حالتون خراب ٿيڻ لڳيون آهن، جنهن سبب پورھيت طبقو پريشاني کي منهن ڏيڻ تي مجبور آهي. اسلام ڪوٽ ويجهو ڳوٺ مگھو ڀيل وڄ ڪرڻ سبب پورھيت جون 25 ٻڪريون سڙي مري ويون. ٽنڊي ڄام، نئين ڪوٽ، پيرس وسڻ، پڊعيدن، کهڙا، سئي گيس، ٺري ميرواهه، راڄوخاناڻي ۾ وقفي وقفي سان برسات سبب نظام ڊانوان ڊول ٿي ويو آهي. موسميات کاتي جو چوڻ آهي ته چوماسي برسات جي سسٽم ۾ شدت برقرار آهي. موسميات کاتي موجب، شهر ۾ وسڪاري جو سلسلو رات تائين جاري رهندو. موسميات کاتي جو چوڻ آهي ته تيز برسات سبب هيٺاهين وارن علائقن ۾ شهري ٻوڏ جو خدشو آهي.s
