سنڌ جي مختلف شهرن ۾ ڪنڌڪوٽ ۾ قتل ٿيل پروفيسر اجمل ساوند جي قاتلن جي گرفتاري لاءِ احتجاجي مظاهرا ڪري ڌرڻا هنيا ويا.
حيدرآباد ۾ پروفيسر ڊاڪٽر اجمل ساوند جي قتل خلاف قاسم آباد جي گورنمينٽ هاءِ اسڪول جي استادن طرفان ٻانهن تي ڪاريون پٽيون ٻڌي احتجاجي مظاهرو ڪيو ويو.
وارهه ۾ پروفيسر اجمل ساوند جي قاتلن جي گرفتاري لاءِ شهرين پاران نجيب چانڊيو، عرفان منان، نياز حيدري ۽ ٻين جي اڳواڻي ۾ پريس ڪلب آڏو احتجاجي مظاهرو ڪري ڌرڻو هڻي نعريبازي ڪئي وئي.
ڍورو نارو ۾ ڪنڌڪوٽ ۾ قتل ٿيل پروفيسر ڊاڪٽر اجمل ساوند جي قتل خلاف احتجاجي مظاهرو ڪيو ويو.
احتجاج ڪندڙن جو چوڻ آهي ته سنڌ ۾ جهنگ جو قانون آهي، پوليس قبيلائي جهيڙا ڪرائيندڙ سردارن آڏو بيوس بڻيل آهي.
هنن چيو ته ڪنڌڪوٽ ۾ پروفيسر ڊاڪٽر اجمل ساوند جو قتل سنڌ جي شعور جو قتل آهي، قاتلن کي گرفتار ڪيو وڃي.
سندن چوڻ هو ته ڊاڪٽر اجمل جي قتل ۾ ملوث سردارن ۽ بااثرن خلاف ڪيس داخل ڪري کين فوري طور قانون جي ڪٽهڙي ۾ آندو وڃي.
اڳواڻن چيو ته قبيلائي جهيڙن کي هٿي وٺرائي موت جو ڪاروبار ڪندڙن خلاف سڄي سنڌ کي گڏ ٿيڻ گهرجي.
هنن اعليٰ اختيارين کان مطالبو ڪيو ته پروفيسر ڊاڪٽر اجمل ساوند جي قاتلن کي گرفتار ڪري عبرتناڪ سزا ڏني وڃي، ٻي صورت ۾ احتجاجي تحريڪ جاري رهندي.
