بچاءَ واري وزير خواجه آصف چيو آهي ته ملڪ ۾ ٻٽو معيار ڇو آهي؟ ڇا عمران خان ماڻهن کي تشدد لاءِ نه ڀڙڪايو؟ ڪور ڪمانڊر جي گهرن ۽ شهيدن جي يادگار تي حملن ۽ ڀڃ ڊاهه جو نوٽيس ڇو نه ورتو ويو؟
اسلام آباد ۾ پريس ڪانفرنس ڪندي بچاءَ واري وزير خواجه آصف چيو ته عمران خان کي صحيح سلامت بنا ويل چيئر جي عدالت پهتو، ٻن ڏينهن ۾ سندس ڄنگهه ٺيڪ ٿي وئي.
هن چيو ته عمران خان جي ميڊيڪل رپورٽ ۽ شوڪت خانم سان سندس ٿيل طبي رپورٽ ۾ ڏينهن رات جو فرق آهي.
بچاءَ واري وزير چيو ته نوازشريف، آصف زرداري، فريال ٽالپر، مريم نواز ۽ ٻين کي گيسٽ هائوس ۾ منتقل ڇو نه ڪيو ويو؟ کيس ته پٽ تي ٻه ڪمبل ڏنا ويا هئا.
خواجه آصف چيو ته عدالتون حڪم ڏينديون آهن، خواهش جو اظهار ناهن ڪنديون، جڏهن نيب کين گرفتار ڪيو ته تڏهن گهرائي ڇو نه پڇيو ويو؟
بچاءَ واري وزير چيو ته هڪ آڊيو ليڪ سامهون آئي آهي، جنهن ۾ قيدي هڪ عورت هدايت ڪري رهيو آهي ته فلاڻي سان رابطو ڪيو.
