اسلام آباد هاءِ ڪورٽ توشاخانه ڪيس ۾ ٽرائل ڪورٽ کي ڪارروائي کان روڪڻ جو حڪم ڏيندي منع نامو جاري ڪري ڇڏيو.
اسلام آباد هاءِ ڪورٽ جي چيف جسٽس عامر فاروق توشاخانه فوجداري ڪيس خلاف پي ٽي آءِ چيئرمين عمران خان جي درخواست جي ٻڌڻي ڪئي.
ٻڌڻي دوران عمران خان جو وڪيل خواجا حارث ۽ ٻيا عدالت ۾ پيش ٿيا.
عمران خان جي وڪيل خواجا حارث دليل ڏيندي چيو ته توشاخانه ڪيس لاءِ درخواست لاڳاپيل اٿارٽي طرفان داخل ناهي ڪرائي وئي.
هن چيو ته درخواست ڊسٽرڪٽ اليڪشن ڪميشن داخل ڪرائي ۽ اليڪشن ڪميشن طرفان لاڳاپيل اٿارٽي مقرر ڪرڻ جو ڪوبه ليٽر پيش ناهي ڪيو ويو.
عمران خان جي وڪيل خواجا حارث دليل ڏيندي چيو ته اليڪشن ڪميشن رڳو پنهنجي آفيس جي درخواست فائل ڪرڻ جو چيو، لاڳاپيل اٿارٽي کانسواءِ داخل درخواست تي ٻڌڻي نٿي ٿي سگهي.
عدالت عمران خان جي ٽرائل روڪڻ جي درخواست منظور ڪري ورتي.
عدالت ڪيس ٻڌڻي جوڳو هئڻ خلاف عمران خان جي درخواست تي اليڪشن ڪميشن ۽ ٻين ڌرين کي نوٽيس جاري ڪري ڇڏيا.
سيشن ڪورٽ 2 ڏينهن اڳ عمران خان تي فرد جرم لاڳو ڪيو هو.
