سنڌ جي اطلاعات کاتي واري وزير شرجيل انعام ميمڻ چيو آهي ته ڪراچيءَ ۾ ٽرانسپورٽ کاتي جي پنجاهه ايڪڙ زمين تي سنڌ اسيمبليءَ ۾ مخالف ڌر جي اڳواڻ حليم عادل شيخ قبضو ڪيو آهي، ٽرانسپورٽ کاتي جي زمين تي حليم عادل شيخ قبضو ڪري مينهن جا واڙا ٺاهيا آهن.

سنڌ اسيمبليءَ ۾ سوالن جوابن جي وقفي دوران سوالن جا جواب ڏيندي شرجيل انعام ميمڻ چيو ته معاملي جي شفاف جاچ لاءِ نندڪمار جي سربراهيءَ ۾ سنڌ اسيمبليءَ جي ڪميٽي قائم ڪئي وئي آهي.

سندس چوڻ هو ته سنڌ اسيمبليءَ جي ميمبرن جي ڪميٽي زمين تان مخالف ڌر جي اڳواڻ حليم عادل شيخ جو غيرقانوني قبضو ختم ڪرائيندي.

سنڌ جي اطلاعات کاتي واري وزير شرجيل انعام ميمڻ چيو ته سکر، شڪارپور روڊ تي ايس آر ٽي جي ست ايڪڙ زمين تي ڪجهه ماڻهن قبضو ڪيو هو.

هن چيو ته سکر، شڪارپور روڊ تي ايس آر ٽي جي ست ايڪڙ زمين تان قبضو ختم ڪرايو ويو آهي هاڻي اتي پيپلز بس سروس جي اسٽيشن قائم ڪئي ويندي.

سندس چوڻ هو ته سانگهڙ ۾ زمين تي قبضي بابت ڄاڻ ناهي جيڪڏهن ڪنهن قبضو ڪيو آهي ته ختم ڪرايو ويندو.

سنڌ جي اطلاعات کاتي واري وزير شرجيل انعام ميمڻ چيو ته 9 مئي تي افسوسناڪ ۽ شرمناڪ واقعا ٿيا، جن ماڻهن بسن کي ساڙيو انهن کان ئي پيسا اوڳاڙيا ويندا.

سندس چوڻ هو ته روڊ تي بس کي روڪڻ به ٽريفڪ قانون جي ڀڃڪڙي آهي.

سنڌ جي اطلاعات کاتي واري وزير شرجيل انعام ميمڻ چيو ته ڪراچي، حيدرآباد ۽ سکر ۾ پيپلز بس سروس شروع ڪري ڇڏي آهي سندن ڪوشش آهي ته هر ضلعي ۾ بس سروس شروع ڪئي وڃي.

هن چيو ته پيٽرول ۽ ڊيزل جا اگهه وڌڻ تي چيو هو ته ڀاڙا وڌايا وڃن، ڪابينا سمري کي رد ڪري ڇڏيو هو، هر مهيني ڪروڙين رپيا سبسڊي ڏئي رهيا آهن.