سڌ سماءَ واري وفاقي وزير مريم اورنگزيب چيو آهي ته سياسي انتقام تي يقين نٿا رکن، عمران خان کي گرفتار يا خاموش ڪرائڻو هجي ها ته هو 14 مهينا انتظار نه ڪن ها، عمران خان جي گرفتاري قانون موجب هئي، عمران خان هميشه عدليا جي توهين ڪئي، ڪڏهن قانون جي پاسداري ناهي ڪئي هو سمجهي ٿو ته ڪير کيس پڇي نٿو سگهي.
پرڏيهي ميڊيا کي انٽرويو ڏيندي مريم اورنگزيب چيو ته عمران خان تي ڪرپشن جا الزام هئا، گرفتاريءَ سان حڪومت جو ڪوبه تعلق ناهي اها گرفتاري نيب ڪئي ۽ قانون موجب هئي.
عمران خان جي نااهلي بابت سوال جو جواب ڏيندي مريم اورنگزيب چيو ته هو عمران خان کي نااهل ڇو ڪرائڻ چاهيندا؟، ڪابه جمهوري حڪومت ائين ڇو ڪندي؟.
هن چيو ته عمران خان پنهنجي دور ۾ سياسي اڳواڻن کي گرفتار ڪيو، جيلن ۾ وڌو ۽ سندن آواز بند دٻائڻ جي ڪوشش ڪئي.
سڌ سماءَ واري وفاقي وزير مريم اورنگزيب چيو ته عدالتي حڪم جاري ٿيڻ بعد اهو سندن آئيني حق آهي ته هو ان آرڊر جو جائزو وٺڻ ۽ انهن بابت ڳالهائن.
هڪ ٻي سوال جي جواب ۾ مريم اورنگزيب چيو ته گذريل ٽن ڏينهن دوران ڪوبه پرامن شهري روڊن تي نه هو، رڳو هٿياربند جٿا ۽ دهشتگرد موجود هئا جن رياستي ۽ عوامي ملڪيتن کي نقصان پهچايو.
