سنڌ حڪومت جي ترجمان مرتضيٰ وهاب چيو آهي ته جيڪا سهولت لاڏلي کي ڏني پئي وڃي ڇا اها ڪنهن ٻي سياستدان کي ملي آهي؟، عمران خان جي دور ۾ آصف زرداري، فريال ٽالپر ۽ ٻين سياسي مخالفن کي بڪتر بند گاڏيل ۾ جيل منتقل ڪيو ويو، عدالت جي حڪم تي لاڏلي کي گيسٽ هائوس ۾ رکي کيس مرسڊيز ۾ وي آءِ پي پروٽوڪول ڏي عدالت آندو ويو.
ڪراچي ۾ ميڊيا سان ڳالهائيندي مرتضيٰ وهاب چيو آهي ته ڪرپشن ڪيس ۾ گرفتار عمران خان کي چيو ويو ته توهان عدالت جا مهمان آهيو، توهان آرام سان بنگلي ۾ رهو ۽ پنهنجي پسند جي 10 ماڻهن کي گهرائي انهن سان ڪچهري ڪيو.
هن چيو ته خان صاحب عدالت ۾ موقف اختيار ڪيو ته سندس گرفتاري بعد ملڪ ۾ ٿيل وڳوڙن جي کيس ڪا به ڄاڻ ناهي، جيڪڏهن توهان کي وڳوڙن بابت خبر نه هئي ته چيف جسٽس اوهان کي ٻڌائي ها ته جيڪو ڪجهه ٿي رهيو آهي اهو غلط آهي.
سنڌ حڪومت جي ترجمان چيو ته جيڪو رليف عمران خان کي مليو آهي، اهو شاهه محمود قريشي ۽ فواد چوڌري کي ناهي مليو، ڇا آئين ۾ لکيل آهي ته عمران خان خلاف ڪا به قانوني ڪارروائي نه ٿيندي؟.
هن چيو ته تحريڪ انصاف پرڏيهي ايجنڊا تحت ملڪ ۾ گهرو ويڙهه ڪرائڻ چاهي ٿي، هي تحريڪ انصاف نه پر تحريڪ انتشار آهي.
