پي ڊي ايم عدليا جي رويي خلاف سومر ڏينهن سپريم ڪورٽ ٻاهران ڌرڻو هڻڻ جو اعلان ڪيو آهي، مولانا فضل الرحمان جو چوڻ آهي ته سپريم ڪورٽ هڪ ڏوهاري ۽ ڪرپشن کي تحفظ ڏئي رهي آهي، عمران خان لاءِ سڀ ڪجهه داءُ تي لڳايو پيو وڃي، سپريم ڪورٽ مدر آف لا آهي، مدر ان لا نه، اسلام آباد هائيڪورٽ به فيصلو ڏنو ته عمران خان کي ڪنهن به ڪيس ۾ گرفتار نه ڪيو وڃي اندازو لڳايو ته عدليا ڪهڙيءَ ريت آئين ۽ قانون کان مٿانها فيصلا ڏئي رهي آهي.

مولانا فضل الرحمان جي صدارت هيٺ پي ڊي ايم جو سربراهه اجلاس ٿيو، جنهن ۾ اتحاد ۾ شامل پارٽين جي قيادت شرڪت ڪئي.

اجلاس ۾ نوازشريف، وزيراعظم شهبازشريف ۽ مريم نواز وڊيو لنڪ ذريعي شرڪت ڪئي، ان کانسواءِ شاهد خاقان عباسي، احسن اقبال، اختر مينگل، مير ڪبير، آفتاب شيرپائو، احمد نواز جدون، طاهر بزنجو ۽ اويس نوراني شريڪ ٿيا.

اجلاس دوران ملڪ جي موجوده سياسي صورتحال ۽ عمران خان جي گرفتاريءَ بعد سپريم ڪورٽ جي فيصلي سميت ٻين معاملن تي غور ڪيو ويو.

اجلاس بعد ميڊيا سان ڳالهائيندي پي ڊي ايم سربراهه مولانا فضل الرحمان چيو ته ٽي ڀيرا وزيراعظم رهندڙ  نوازشريف، مريم نواز، فريال ٽالپر ۽ ٻين کي اهڙي رعايت ڇو نه ڏني وئي؟

هن چيو ته سپريم ڪورٽ مدر آف لا آهي، مدر ان لا نه، سومر ڏينهن سڄي قوم اسلام آباد پهچي، سپريم ڪورٽ آڏو ڌرڻو هنيو ويندو.

مولانا فضل الرحمان چيو ته عدالت دهشتگردي ۽ ڏوهاري کي تحفظ ڏئي رهي آهي، غبن ۽ دهشتگردي ڪندڙ جو حوصلو واڌايو ويو.

پي ڊي ايم سربراهه چيو ته هائيڪورٽ به فيصلا ڏنا ته 9 مئي کانپوءِ واقعن بعد ڪنهن به ڪيس ۾ عمران خان خلاف ڪارروائي نه ڪئي وڃي  ۽ کيس ڪنهن به ڪيس ۾ گرفتار نه ڪيو وڃي، ايستائين جو جنهن ڪيس بابت خبر به نه هجي ان ۾ به گرفتار نه ڪيو وڃي.

مولانا فضل الرحمان چيو ته اندازو لڳايو ته عدليا ڪهڙيءَ ريت آئين ۽ قانون کان مٿانها فيصلا ڏئي رهي آهي.

پي ڊي ايم سربراهه چيو ته اهو سولو طريقو آهي ته ڪنهن کي نااهل قرار ڏنو وڃي،  هو 2-3 نه پر  4-3 جو فيصلو تسليم ڪن ٿا.