سنڌ ۾ ميٽرڪ جا امتحان جاري آهن، ڪراچي، حيدرآباد، سکر، لاڙڪاڻي، ميرپورخاص ۽ نوابشاهه جي مختلف شهرن ۾ نائين ۽ ڏهين جي امتحانن دوران ڪاپي جي ڌم متل آهي، مختلف سينٽرز تي پيپر وقت کان اڳ آئوٽ ۽ لوڊشيڊنگ تي به ضابطو نه اچي سگهيو.
سنڌ ۾ نائين ۽ ڏهين جماعت جا امتحان جاري آهن جڏهن ته اڪثر امتحاني مرڪزن تي بجلي بند هئڻ سبب شاگرد ۽ شاگردياڻيون سخت تڪليفن کي منهن ڏيڻ تي مجبور ٿي ويا.
ميرپورخاص ۾ امتحاني سينٽر ۾ لوڊشيڊنگ سبب هڪ شاگرد زيد بيهوش ٿي ويو جنهن کي اسپتال منتقل ڪيو ويو.
امتحاني عملي جو چوڻ آهي ته پيپر دوران بجلي نه هئڻ سبب شاگرد بي حال بڻجي ويا.
ڪنٽرولر انور عليم خانزادي اعليٰ اختيارين کان مطالبو ڪندي چيو ته پيپر دوران لوڊشيڊنگ نه ڪئي وڃي.
لاڙڪاڻي ۾ به امتحاني سينٽرن ۾ لوڊشيڊنگ سبب ٻن شاگردن جي طبيعت خراب ٿي وئي جنهن کي اسپتال منتقل ڪيو ويو.
شاگردن پاران بجلي جي لوڊشيڊنگ خلاف امتياز، ڏنل خان جاگيراڻي، احمد خان ۽ ٻين جي اڳواڻيءَ ۾ احتجاجي مظاهرو ڪري نعريبازي ڪئي وئي.
لاڙڪاڻي جي امتحاني سينٽرن ۾ ڏهين درجي جي ڪيمسٽري جو پيپر وقت کان اڳ آئوٽ ٿيڻ بعد شاگرد ڪاپي ۾ رڌل رهيا.
عمرڪوٽ ۾ به امتحاني سينٽرن ۾ پيپر دوران لوڊشيڊنگ سبب شاگردن ڏکيائين کي منهن ڏيڻ تي مجبور ٿي ويا.
گپچاڻي ۾ پيپر دوران بجلي جي اکٻوٽ جو سلسلو جاري رهيو.
جيڪب آباد جي امتحاني سينٽرن ۾ ڪاپي تي ضابطو نه اچي سگهيو جڏهن ته شاگرد ۽ شاگردياڻيون ڪاپي ڪري پيپر حل ڪرڻ لڳا.
ڊگهڙي ۾ ڪنٽرولر انور عليم خانزادي گورنمينٽ هاءِ اسڪول تي ڇاپو هڻي ٽن شاگردن کي ڪاپي ڪيس ڪندي ٻن انويجيليٽرن کي هٽائي ڇڏيو.
سرهاڙي ۾ نائين درجي جي فزڪس جو پيپر وقت کان اڳ واٽس ايپ تي آئوٽ ٿي ويو ۽ امتحاني سينٽرن تي ڪاپي جي ڌم رهي.
